DyAB Skypecast

Katihik ug determinasyon. Mao nay nakaaghat namo pagdiskubre sa Skypecast. Lahi sa ubang sibyaanan nga mabati na sa Internet, ang among sibyaanan nagsalig pa lang sa gikusgon sa signal sa iyang transmitter. Duna na mi presensiya sa web-sama sa blogs, email groups ug podcasts-apan wa pa mi live audio streaming.

Daghan nang mga kompaniya nga nitanyag nga maoy mosibya sa DyAB Abante Bisaya sa Internet. Apan di ming kasanong nila. Kay mao sab ni plano sa among network. Alang sa tanan namong sibyaanan sa radyo (AM ug FM) ug telebisyon.

Sa pikas nga bahin, di na ming kapaabot. Maong nangahas mi pag-eksperimento.

* * *

Tungod sa kabalaka nga atakehon mi og virus, ang among IT nidili sa instant messaging ug ubang sharing applications among personal computers. Wa mi YM, Google Talk, Friendster, YouTube ug Skype. Text ray among gisaligan aron makaapil ang mga tigpaminaw sa among mga tulomanon.

Maong nidangop mi sa Smart Bro. Ilang internet access maoy nagpalihok sa usa namo ka PC nga buwag sa server. Maong makapatuyang mig install og applications nga di mameligro ang mahinungdanong mga dokumento sa kompaniya.

Mora ming mga baka nga nakagawas sa toril. Ang bag-ong mga teknolohiya nibukas og bag-ong kalibotan sa way kinutoban namong kasibot. Apan among kapilian kinahanglan nga libre.

* * *

Among gisuwayan ang Odeo, web-based nga application nga mo-record og hangtod usa ka takna nga sibya, labaw sa ubang applications nga nagtanyag lang og duha (YM) hangtod napu ka gutlo (GTalk). Nagpatuyang mi pag-record sa among mga tulomanon. Kay dumalahon man sa servers sa Odeo, way hago among hard disk. Apan karong bag-o gihunong sa Odeo ang talagsaon nilang serbisyo.

Maong napugos mi pagsuway sa Skypecast. Di siya mo-record apan mosibya nga buhi sa among mga tulomanon. Lima ka takna ra ang usa ka sesyon apan mahimong lab-ason bisan pila ka higayon. Labaw sa tanan, morang CD katin-aw ang tingog.

* * *

Wa ming kahibawo kanus-a kutob ang Skypecast. Beta pa busa mahimong molambo pa gyod sa mosunod nga mga adlaw. Peer-to-Peer ang teknolohiya sa Skype busa mas monindot ang kalidad kun mas daghan ang mogamit. Sa labing unang higayon, ang mga Sugbuanon sa Dubai ug Arkansas di lang makapaminaw makasagbat pa gyod sa among mga tulomanon.

Maong ubani mi sa among eksperimento:

• Download ug i-install ang Skype (gikan sa http://www.skype.com);

• Ibutang ang login name ug password (kopyaha lang imong login ug password sa Yahoo, • Gmail, o Hotmail aron di maglibog);

• Ablihi ang imong browser ug adto sa http://tinyurl.com/dyabcebu nga maoy nahimutangan sa DYAB Cebu Skypecast;

• I-click ang “Join this Skypecast;” ug

Maabli ang imong Skype application ug makapaminaw ka na sa buhi nga sibya sa DYAB Abante Bisaya.

* * *

Email: [email protected]