Kasagaran nato, sensitive kaayo sa mga pagsaway. Natural. Dali rang madutlan, ug kun mahimo manimawos gyud. Sagad natong immediate nga reaction, mao ang pagpakgang sa mga pagsaway, ug pagpangitag paagi nga makabawos, pinaagi sa pagbalitok sa mga pagsaway, pagpanghimaraut sa misaway kanato.
Giingon nga inigkatawo kono nato, adunay duha ka bag nga nagbitay sa atong liog. Ang usa sa atubangan, ang laing bag, sa likod. Ang duha ka bag puno sa mga kasaypanan ug mga kahiwian sa tawo. Sa ato pa, sa dughan ug sa bukobuko. Ang anaa sa dughan puno sa mga kasaypanan sa atong silingan, ug ang sa likod, gisudlan sa kaugalingon natong mga kasaypanan.
Atong mahulagway dinhi nga ang pirme natong makita mao ang mga faults and failures sa atong silingan, kay anaa man sa atubangan, samtang di gyud ta kakita sa kaugalingon natong mga faults and failures tungod kay tua man sa likod.
Mao kini karon ang katilingban. Mapuno kita sa mga pagsaway sa uban, apan makalimot kita nga utro usab kitang salawayon, ug lagmit, mas salawayon pa kay sa atong gisaway.
Sa miaging civil war sa America, usa ka adlaw, si President Jefferson Davis, nagpapangita og usa ka kasaligan nga officer alang sa usa ka importante kaayong command. Daghang ngalan ang girekomendar. Usa niini usa ka ginganlan og Whiting.
Gipatawag ni Davis si General Lee, usa sa mga kadagkuan sa kasundalohan ug gipangutana kun unsay iyang ikasulti bahin kang Whiting. Gidayeg pag-ayo ni Lee si Whiting, ug girekomendar sa puwesto.
Laing dakung opisyal sa kasundalohan sa Amerika, nangutana kang Lee nganong iyang girekomendar si Whiting, wa ba kono siya masayod nga si Whiting sigeng panglibak, panaway, ug grabe kaayong modaut kaniya.
Iyang tubag: “I understand that the President wanted to know my opinion of Whiting, not Whiting’s opinion of me.” Kasabot ka, Dro? Mahimo kaha ni nato? Mo-rekomendar kaha ta sa tawo nga sigeng panaway ug daot nato?
Ang tubag ni General Lee mao nga wa man mangutana ang Presidente kun unsay opinyon ni Whiting bahin kang Lee. Wa ma-interested ang Presidente kun unsay mga pagsaway nga gihimo ni Whiting batok kang Lee. Mao nga iyang girekomendar si Whiting gumikan sa qualification, bisag sigeng panglibak niya. Mahimo ni nimo, Dro?