Katin-awan

Mora’g lahap ra tingali kaayo ang pamahayag ni Provincial Board Member Juan Bolo nga gi-tarnish nako ang imahe sa provincial board dihang wala ko motuman sa ilang imbitasyon.

Ang tinuod, gawas nga nagkahinabi na kami ni Provincial Board Member Agnes Magpale, miadto g’yod ko sa iyang opisina apan wala lang kami magkakita.

Gibinlan ko hinoon og kopya ang iyang mga staff kabahin sa audit report sa Commission for the Welfare of Children nga maoy gibasihan nako sa akong report nga maoy nasakitan sa mga opisyal sa Kapitolyo.

Kay wala man didto sa iyang opisina atul sa maong higayon si PB member Magpale, misuway ko sa paghapit sa opisina ni Bise Gobernador Greg Sanchez.

Dili g’yod siya maoy akong tuyo sa pag-adto nako sa Kapitolyo, apan isip “courtesy” kay dugay na man kaming managkaila dihang board member pa siya kaniadto, ako lang gihapit.

Giagda tinuod ko sa iyang staff nga palingkoron, apan akong giayo pagbalibad nga dili lang ko molingkod kay nagdali ko adtong higayona sanglit motambong pa ko og press conference ni Mayor Tomas Osmeña.

Kay mora man og daghan pa og bisita ang bise gobernador, wala dayon ko makasulod, ug mao nga mibiya na lang ko sa iyang opisina.

Tan-aw nako dili tukma ang paghulagway ni Bise Gobernador Sanchez nga “show of arrogance” ang akong gihimo. Unsa may buot niya mahitabo huwaton g’yod diay nako siya bisan og daghan pa siya og bisita?

Duna ba diay lagda nga kun makasumiter ka na og “visitor’s slip” alang sa usa ka opisyal nga buot nimo pakigkitaan, obligado ka na g’yod nga mohuwat hangtud kanus-a ka pasudla?

Sa gipasabot na nako kanila nga “busy” usab kaayo ko sa akong trabaho mao man gani nga maglisud ko pagtambong sa ilang sesyon matag Lunes sa hapon.

Kaming mga reporters mangita g’yod og tulo ngadto sa upat ka news alang sa The Freeman ug subra pa niini ang akong gikinahanglan sa DYLA diin anaa ako magtrabaho.

Gisakripisyo na lang gani nako ang akong ubang oras pag-adto sa opisina ni BM Magpale ug sa pagpakigkita ni Bise Gobernador Sanchez apan kun huwaton pa nako kini nga mahuman sa pag-abi-abi sa iyang mga bisita nga nauna kanako, dili na ko makatambong sa press conference sa mayor.

Ang isyu lang g’yod niini mao ang akong balita nga nagbutyag nga ang kagamhanan sa lalawigan mi-hire og ECCD officer nga “unqualified” sa katungdanan.

Nakasabot man gani ang ubang opisyal diha sa Kapitolyo nga tukma ang akong balita.

Igo ra ko nga nagkutlo sa report sa Commission on Audit nga nagbutyag nga ang gi-hire ninyo nga ECCD officer “did not meet the required standards set forth by the law.” Unsa man diay ipasabot sa maong pagkasulti?

Kun sa inyong argumento moingon kamo nga dili ang probinsya sa Sugbu ang nag-hire sa maong ECCD officer, pwes basaha pag-ayo ang audit report.

Klaro man kaayo diha nga nag-ingon ang audit report nga “The ECCD officer hired by the provincial government of Cebu.” Wala man diha gibutang sa COA report nga ang maong ECCD officer nga gihulagway nakong “unqualified” gi-hire sa Commission for the Welfare of Children sa Manila.

Isip abogado, si PB Member Bolo makasabot gayod kaayo niini, aw bisan si Bise Gobernador Sanchez nga usa ka professional civil engineer.

Kabahin sa wala nako pagtunga sa inyong sesyon, tungod lagi kay busy kaayo ko sa akong mga trabaho, gisuportahan usab kini sa among mga opisyal sa media.

Bisan ang editor-in-chief sa Sun Star nga si Atty. Pacheco Seares mitataw g’yod nga tukma ang akong gihimo. Kun duna moy reklamo sa mga balita nga maglambigit kaninyo, paghimo kamo og “letter to the editor” ug iklaro ang inyong mga argumento.