Drugas sa Ocaña

"Good day, Sir. Ang among barangay diri sa Ocaña, Carcar kay grabe na kaayo ang pagkuyanap sa ginadiling drugas. Lantaran na kaayo. Wala gyod makasumpo ang mga polis diri sa amoa." -- 0918-7585775 (Sent: 08:42:19pm--April 3, 2008)

* * *

Kun "lantaran" o dayag na kaayo ang pagpamaligya o pagpayuhot og drugas diha sa Ocana, Carcar, nagpasabot nga ingon sa walay gikahadlokan ang mga tigpayuhot niini. Nagpasabot sab kini nga daghan na ang nasayod sa maong kalihokan ug maisip na gani kining public knowledge.

Kun tinuod man  ugaling kini, makaingon kitang dunay pagpabaya sa habig sa mga tigpatuman sa balaod. Atong sangpiton ang atensiyon sa kapolisan sa pag-counter check niining taho sa usa ka nagpakabanang molupyo sa Ocana. Labing maayo sab nga mohimog pakisusi niini ang mga barangay opisyal sa Ocana aron pagsuta kun tinuod ba kini o dili.

* * *

"Good day, Sir. Niay kasinatian sa akong Mama nga akong ipaambit. Usa ka adlaw niana naay nitawag niya nga nagpaila nga akong igsuon. Nagpatabang kay hapit kuno malunod ang barkong iyang gisakyan. Nangayo og load, ASAP daw kay hapit na daw mahurot iyang load. Tungod sa karatol ug tungod kay may low  pressure man sab niadtong tungora, nituo ang akong Mama. Nag-load sad tawon siya sa amaw nga nanawag. Uwahi na nga nakahinumdom siya nga motawag sa akong kuya nga niadtong higayona didto sa iyang opisina. Nabiktima intawon ang akong Mama." -- 0923-4159317 (Sent: 10:00:45 am--April 4, 2008)

* * *

Maayo gani kay load ray gipangayo. Ang nakapait gyud kun gipangayoan ang imong Mama og dakong kantidad sa kuwarta. Pero ang punto man god niini mao nga sa usa  ka paagi o sa lain, nailad ang imong Mama.

Atong pahimangnoan ang atong kaigsuonan sa pagbantay niining mga mangingilad nga ang modus operandi mao ang pagpanawag sa telepono ug magpaila nga inyong kabanay ug magpatuo nga nahisugamak siya sa emergency. Sutaa una ninyo kun katuohan ba ang iyang pangangkon. Ilha sab ang iyang tingog. Siyaro na man sab kun dili mo makaila sa tingog sa inyong anak, igsuon  o paryente nga sinati kaayo ninyo.

Aw, kun ipaagi lang hinuon sa text ang pagkontak sa mangingilad ninyo, wala gyod kamoy dag-anan. Bisan pa man, ang pag-amping ug pagbantay mao gihapon ang epektibong paagi paglikay sa mga mangingilad. Busa, pagbantay.

* * *

(Sumbong ug reklamo? Text sa 0910-8105522)