EDITORYAL - Ronda nasad sa Kamayagan

Gironda na sab sa makausa pa ang interior nga bahin sa barangay Kamagayan, ning siyudad, diin ubay-ubay’ng mga lalaki ug babaye ang nasikop.

Ang nangasikop gilangkuban og mga adis-adis, mga gidudahang boring ug mga giingong pimps kon bugaw.

Daghang mga tigpaniid nga milingo-lingo ug mipahiyom lang. Makadaghan nang gironda ang maong dapit apan nabuhian lang gihapon ang mga nangadakpan ug nahibalik ra gihapon sa ilang lublubanan.

Matud sa polis lisud limpiyohan ang maong barangay sa mga undesirable elements tungod kay ang mga nanimuyo diha dili mokooperar kon makig-alayon kanila (polis).

Ang mga opisyal sa barangay unta mohatag sa ilang higpit nga pag-alayon sa kapolisan pinaagi sa periodic nga pulong-pulong tali sa mga lumolupyo diin isilsil sa ulo sa mga residente nga kinahanglan gayud nga malimpyohan ang ilang dapit.