Mga pasahero sa Princess of the Stars

Ang mga pasahero sa Princess of the Stars ang dili matawag natong mga makasasala mao nga sila napahamtangan sa ingon. Apan dili sad ta makalimod nga dili tanan nila ang maisip natong mga tarong kini tungod kabahin man sa atong pagkatawhanon ang pagkamahuyang ug pagka-masalaypon. Apan bisan pa, tino gyud nga nagmasulob-on ang Ginoo ingon man ang tawo tungod sa maong panghitabo, sanglit, makasasala man o maayo, dili buot ang Ginoo nga mahitumpawak sa kadaot ang iyang mga binuhat.

Ingon ini usab ang nahitabo sa Ebanghelyo karong Domingoha. Nagdungan og tubo ang sagbot ug ang trigo. Kun ibton sa mga sinuholan ang mga sagbot posibling maangin ang mga trigo. Ang tag-iya, igo na lang sa pagpaabot sa tukmang higayon sa ting-ani aron maibot ang trigo uban ang mga sagbot.

Diha sa atong tawhanong kasinatian, sa makadaghan nahimong nagmalipayon kita diha sa pagsinati sa mga panalangin nga gikan sa Dios. Managsamang nakasinati sa kainit sa bidlisiw ni Haring Adlaw ang mga dautan ug ang mga maayo. Ingon ini kamanggihatagon ang Ginoo. Tanan, nakatagamtam sa kaanindot sa kinabuhi. Maingon nga ang simbahan nahimong mabulokon dili lang tungod sa mga santos kondili apil na usab sa mga makasasala.

Balik sa trahedya sa dagat. Mao kini ang pangutana nga lisud kaayo tubagon. Mao kini ang nakapahimo kaniya nga misteryoso nga kun makiangayon pa ang Dios nganong naapil man ang mga inosente. Apan alang kanako ang nakapahimo niini nga misteryo dili ang kalisud sa pagpangita sa tubag, kondili tungod sa mas lawom nga kahulogan niini alang kanatong mga tawo. Ug unsa man ni? “NGA DILI NATO TUYOAN ANG PAGHIKAP SA KALAYO UBAN ANG PAG-AMPO    NGA DILI UNTA KITA MAPASO!”