Bugal-bugal sa NFA

Gitabangan sa amahan ug anak nga kongresista ang abogado sa dakbayan sa Lapulapu sa paglalis kun si kinsa ang adunay gahom sa pagtugot sa paghimo og mga reclamation. Sila si kongresista Pabling ug Pablo John Garcia mibarog nga ang Mactan North Reclamation and Development Project sa dakbayan sa Lapu-lapu nanginahanglan kini og pagtugot sa Regional Development Council kon RDC apan si Michael Dignos manlalaban sa nahisgutang dakbayan misupak. Matud pa niya, wa na kinahanglana ang pagtugot sa RDC sa nahisgutang proyekto tungod kay dili nasudnong pundo ang gamiton sa paghimo niini kun dili lokal.

Dili na lang ko moapil sa ilang lantugi mahitungod sa legalidad sa maong proyekto ug sa lalis si kinsa ang adunay gahom sa pagtugot niini. Ang ako lang pangutana, gikinahanglan ba sa kaliwat ni Lapulapu ang nahisgutang proyekto?

Matud pa, ang 400 ektarya nga Mactan North Reclamation and Development Project maoy butangan sa International Port, extention sa Mactan Export and Processing Zone, Commercial District ug Turismo. Kay ngano, napuno na diay sa barko ug eroplano ang atong mga International port dinhi sa Sugbu? Wa na diay nahabiling bakanteng lote nga katukoran og negosyo ang MEPZ 1 ug 2? Balikon ko, gikinahanglan ba ugod sa mga taga dakbayan sa Lapulapu ang Reclamation nga proyekto?

Kining maong proyekto gastohan sa pundo nga lokal busa di nato kalikayan ang kabalaka nga basin kun madayon maparehas unya kini sa South Road Properties nga wa pa gyod tawon mahalin. Unya kay inutang man ang gigasto sa paghimo sa proyekto, di tan-awa nagsangkiig ang dakbayan sa Sugbu sa pagbayad niini.

Sa laing bahin gikonsider ba sa mga nagpasiugda ning maong proyekto ang kahimtang unya sa mga mananagat nga maapektohan ingon man ang mga adunay kinabuhi nga nanimuyo ilawom sa dagat sama sa mga isda?

* * *

Wa ko makasabot sa gihimo sa National Food Authority kon NFA ug sa atong gobiyerno mahitungod sa ilang pagpamaligya og bugas ngadto sa katawhang kabus. Ambot ug madaug-daugon o bugalbugalon ba lang kaha ang atong gobiyerno natong mga kabus. Sayonan ka nga bisan sa pagpalit sa baratohong bugas sa NFA ila pa gyod tang gipaantos pinaagi sa pagpalinya. Ngano bang dili naman lang mobutang og dugang mga Tindahan natin nga mga outlet ang NFA aron dili na tawon maagwanta og pinaabot sa taas nga linya ang katawhang kabus? Gituyo ba kini sa NFA ug sa gobiyerno tungod kay malingaw silang magtan-aw sa mga kabus nga nagkadusingot, gitugnaw ug nagsumbagay na aron lang makapalit og baratong bugas?