Dili malalis nga ang kabangis sa bagyo dili arang mapakigbatokan sa tawo. Walay bisan usa nga maayong laki atubangan sa katalagman. Ang labing bangis nga bagyo sa kaugalingon kong kasinatian sa kinabuhi mao kadtong bagyong Nitang (September 2, 1984). Bisan tuod nga kadtong maong bagyo dili ingon ka "kriminal" sa bagyong Frank (kun bahin sa mga kinabuhing nakalas maoy hisgotan), apan dako sab kaayog kadaot nga nahimo ang bagyong Nitang sa mga dapit nga naigo niini.
Usa sa labing naigo sa bagyong Nitang mao ang among lungsod sa Mabini sa lalawigan sa Bohol. Daghang mga kabtangan nga nangadaot. May mga patay'ng lawas sa tawo nga nangadagsa sa baybayon sa among barangay nga wala na mailhi ug wala na mahibalik ngadto sa mga tagtungod.
Ang bagyong Nitang nakaapekto'g maayo sa among kinabuhi. Nakaguba kini sa kusina sa among balay. Nawalis sab ang atop sa among balay gumikan sa kakusog sa hangin nga gidala sa maong bagyo ug nakahigda gyod intawon mi'g usa ka gabii nga molagbas sa langit ang among tinan-awan.
Ang maong bagyo nakadaot sa among umahan ug sa mga tanom sa ubang katawhan. Napayhag ang among kalubian kay daghan kaayong mga punoan sa lubi nga nangapukan. Ang kasagingan daw naagian og naghuramentadong hubog.
Ang bagyong Nitang nakaguba sa among eskuylahan sa hayiskol ug gumikan sa dakong kadaut nahunong ang among pagklase sa kapin duha ka semana. Naguba usab niadtong tungora ang tunghaang elementarya sa among barangay sa Tambo. Sa ubang mga dapit nangaguba ang karsada.
Paghuman sa bagyo, nasinati sa katawhan ang grabeng kalisud. Nakadawat mi'g hinabang gikan sa kagamhanan ug sa mga misyonaryong Mennonite pero "gikapnan" pod kini sa mga politiko. Sa laktud wala gyod namo madawat ang tanang hinabang nga alang unta kanamo.
Nakadawat mi niadtong tungora og 2 kilos nga bugas nga dili mawagtang ang baho bisan hugasan sa pagkilis sa tulo ka higayon. Gawas sa bugas, may mga delata, lansang (2 kilos), gatas, bulgor ug uban pa. Kun wala pa unta sakyi sa mga mapahimuslanon, mas daghan pa tingali niini ang nadawat namong hinabang. Morag mao sab kini'y nahitabo karon sa higayon nga may modangat nga kalamidad.
Wala kitay igong gahom pagsagang ug pagsanta sa bagyo. Bentaha na lang unta kun mamoderno'g diyotay ang atong mga ekipo sa pagbasa og pagbanabana sa panahon aron kalikayan ang mas grabeng kadaot.