Lami ba ang gidili?

Sa gamay pa kitang mga bata, ang atong ma ginikanan ug mga katigulangan nagdili kanato sa pag-inom og tuba  ug sa panigarilyo.

Apan inigkalipat nila, mosikreto kita sa pagdimdim kun unsa gyu'y lami sa tuba hangtod naanad na lang kita karon sa pag-inom og makahubog bisan pa sa kalisod sa panahon.

Bisan og lisod karon ang panahon, dili na hinuon tuba ang sigihag inom kun dili ang mga dagkong Beer Grande ug mag-videoke pa kay one-day millionaire kuno siya bisan og walay bugas ang pamilya nga malung-ag.

Ang ubang mga asawa mopahimangno sa ilang bana nga dili gyud mangbabaye o mangabit. Bisan pa niini, inigkalipat sa asawa molighot gyud og pangabit o pangmabaye kay iring-iringon man ang kumare o bayaw'ng babaye sa laktod nga pagkasulti.

Ang atong balaod nagdili gyud sa hingpit sa paggamit ug pagsuyop og 'shabu' apan nagkadaghan na hinoon karon ang mga "drug-addicts" sa atong palibot.

Makadaot kuno ang sugal kay daghan na kaayo ang nangapordoy ug nawagtangan sa ilang purol gumikan lagi sa sugal apan daghan na hinuon ang nangaboang sa sugal sama sa bulang, tigbakay, tong-its, hantak, masiao, lotto og uban pa.

Kun pahimangnoan gani ang anak babaye sa iyang mga ginikanan nga dili mag-uyab uyab kay nag-eskuyla pa, daghan hinuon og mga 'boyfriends' pinaagi sa cellphone ug internet.

Ang ilang mga boyfriends nagalangkob sa Pinoy, American Negro, Ostralyano, Hapon, Turko ug Mexicano. Magkalisod apil sab ang Intsik.

Kun maymayan sa amahan ang anak lalaki sa dili pagsige og lakaw ug rampa panahon sa kagabhion kay delikado kaayo karon ang panahon, magsige hinuon og lakwatsa kuyog sa mga barkada  ug buntag na gani mahiuli sa ilang panimalay.

Lain pa, kun tambagan gani ang atong asawa nga dili mangotang kay hasol og samok kaayo ang pagbayad niini, magsige hinuon og pangutang sa mga appliances lakip na sa Turko nga kada-adlaw gyud ang singil sa bayad lakip na sa adlaw'ng Domingo.

Lami gyud diay ang gidili? Di ba?