Abu Sayyaf na pod

Gibuhian na gyud sa Abu Sayyaf ang ilang mga bihag nga mga sakop sa media ug ang magtutudlo nga nagsilbing giya alang unta sa pagkuha og balita. Giingon nga way ransom nga gihatag ngadto sa mga kidnappers ang gobiyerno, kabanay ug ang kompanya nga gitrabahoan sa mga bihag. Ambot og tinuod ba kaha nga way ransom nga gibayad.

Karon nga nabuhian na ang mga bihag panahon na seguro nga tinod-on na gyud sa gobiyerno ang pagpuhag ning bandidong grupo nga naghatag lamang og daut  nga imahin sa atong nasud kay kun dili sila mapuhag magtoo na ang katawhan nga gibuhi ning grupoha sa atong kagamhanan.

* * *

 Naglaraw karon ang siyudad sa Sugbu sa pagpalit og luna nga kabalhinan sa mga molupyo sa Barangay Sinsin nga apektado sa mga pagbaha aron mahiluna na kini sa ilang kapuy-an. Magpasalamat ta sa kagamhanan ning maong lakang tungod kay ila gayod nga gitabangan ang apektadong mga molupyo. Pero awhag nako ngadto sa mga tag-iya og yuta nga palitan sa kagamhanan sa siyudad sa Sugbu nga paneguro gayod kamo sa yuta nga inyong ibaligya kay basin mapariha mo sa mga Palicte nga hangtod karon, unom na lang ka tuig wa pa gyod tawon mabayri sa siyudad.

* * *

Salamat og gisugdan na gayod sa buhatan sa Visayas Ombudsman ang ilang gibalik nga Operation Red Plate kon pagbantay niadtong mga sakyanan sa gobiyerno nga gipanggamit bisan sa oras dili ting trabaho ug kahibawo mo mga kapuso kun si kinsa ang una nilang nasakpan? Ang sakyanan ni Mayor Tomas Osmeña ug Bise Mayor Michael Rama. Hinuon, wa ni silay angayang kabalak-an kay dali ra man ni silang makapasabot, ang trabaho man ugod sa mayor ug bise mayor wa magtan-aw og oras, mura ni sila og doktor 24 oras nga on-call, mao na nga bisan og nanimahong bino nakop lang gihapon og mga taxi drivers nga mga badlungon.

* * *

Hingpit na gayod nga balaod ang Tax Exemption Law human pirmahi sa pangulo ang maong balaodnon. Gawas niini epektibo na usab sugod kaniadtong petsa 16 ning buwana ang 17 pesos nga umento sa mga minimum wage earners, salamat kay murag hinay-hinay na ta aning makabayad sa atong mga nautangan. Ang problema lang kun nakaamo ka og suwapang.