VAT o subsidy

Makatabang sa mga kabus nga mga konsumedor sa kuryente ang P500 nga subsidy nga gipanghatag sa Malacañang.

Bisan gamay na lang kaayo purchasing power sa atong kuwarta karon, ang P500 dako na kaayo og ikatabang sa mga kabus bisan sa dali lamang nga panahon.

Ang Malacañang adunay laing plano nga mohatag usab og subsidy sa apektadong mga kunsomedor ug sektor sa transportasyon nunot sa padayong pagtaas sa presyo sa mga produktong petrolyo tungod sa padayong pagsaka sa presyo matag barel sa krudo sa kalibutanong merkado.

Ikalipay gihapon ang maong subsidy sa mga kabus nga mga konsumedor sa mga produktong petrolyo, ilabi na ang mga drayber nga direktang naapektahan sa pagmahal na sa gasolina ug diesel.

Apan sa akong tan-aw mura og tuyoktuyok ang pamaagi sa kagamhanang nasyonal pagtabang sa mga kabus nga mga konsumedor, bisan aduna untay maayong pamaagi nga makaginhawa gikan sa krisis.

Gihulagway ni Sen. Mar Roxas nga ‘circuitous’ kun tuyoktuyok ang maong pamaagi tungod kay mag-agi usab kini og bureaucratic red tape una pa makatabang sa mga kabus nga mga Pilipino.

Ngano man?

Aron makahatag og subsidy ang kagamhanang nasyonal, kinahanglang mokuha una og pundo gikan sa kaban sa gobiyerno alang sa maong katuyoan.

Sama pananglit nianang P500 nga subsidy sa mga power consumers nga karon gisugdan sa kauluhan, bali og P2 bilyones ang gibuhiang pundo ni Pres. Arroyo.

Wala pa kita masayod pila ang ibubo nga pundo alang sa subsidy sa mga kunsomedor ug sektor sa transportasyon.

Apan gipaklaro na daan sa kagamhanang nasyonal nga ang pundo nga gamiton alang sa maong subsidy sa petrolyo maggikan usab sa napundo gikan sa expanded Value Added Tax nga gipatong sa mga produktong petrolyo.

Mao kini ang hinungdan nga makaingon kitang tuyoktuyok ang paghatag og subsidy isip pamaagi pagtabang sa mga Pilipino nga naapektahan sa nagpadayong pagpamahal sa mga produktong petrolyo.

Nganong subsidy man gyud nga aduna man untay pamaagi nga direkta ang benepisyo ngadto sa mga konsumedor ug sektor sa transportasyon?

Unsa man kini nga paagi?

Simple! Kuhaon ang VAT sa tanang produktong petrolyo mao ang direktang pamaagi pagtabang kun buot sa gobiyerno ang pagtabang sa mga nagkalisud na natong kaigsuonan.

Makita usab nato nga lisud ang pagpatuman niini nga makiangayon alang sa mayoriya kun dili man ugaling tanan nga apektado sa krisis. Unsaon man pag-ila sa gobiyerno sa saktong beneficiaries niini?

Usa pa, lisud usab alang sa mga kabus ang pagkubra sa subsidy. Sama sa nanghitabo karon sa kauluhan nga daghan ang wala makakuha tungod sa pamaagi sa pagkubra nga ipaagi sa Land Bank of the Philippines. Unya, daghan sa nanglinya sa Land Bank nga nanguli sa ilang tagsatagsa ka panimalay nagluha ang mga mata unya naminghoy ug walay sulod ang bulsa tungod sa walay klaro nga sistema sa pagpang-apud-apod sa subsidy.

Naglibog ko nganong ganahan kaayo ang kagamhanang nasyonal pagkolekta sa VAT sa mga produktong petrolyo aron kunohay makapundo, apan kuhaon lamang aron ipanghatag ngadto sa mga tawo pinaagi sa pagatawgon nila og subsidy.

Kun tuyo sa gobiyerno ang pagtabang sa mga naapektahan sa krisis sa presyo sa lana, labing maayo ang pagtangtang na lang sa VAT kay sa paghatag og subsidy.

Kun kuhaon ang VAT mas nindot pa tungod kay dili na mogasto ang gobiyerno sa pagkolekta niini nga mouli pa hinuon sa panikas sa mga negosyante tungod sa dili pagdeklarar sa ensakto ug ang panikas sa koleksiyon niini pinaagi sa BIR.

Kun VAT ang kuhaon, wala nay tuyoktuyok ang paghatag og tabang sa mga kabus.