Salamat Sir

Pastilan, misaka na usab ang presyo sa mga petroleum products sugod kagahapon sa kaadlawon.

Human giusbawan og laing P1.50 ang matag litro, ang matag litro sa gasolina nagkantidad na og mohapit P60.

Ang diesel mokantidad na og P50.26 ang litro. Tarong pa ba god ni? Wala na lay bali sa mga tag-iya og private cars, apan ang mga drayber sa PUJ apektado.

Gani ang kapolisan apektado usab sa pagpahigayon nila og pagpatrolya ginamit ang ilang patrol vehicles.

Apan dili man god kay ang mga drayber lang sa PUJ ug ubang public utility vehicles ang apektado kun mosaka pag-ayo ang presyo sa gasolina.

Ang tanang katawhan g’yod nga mamalit sa ilang inadlaw’ng panginahanglanon apektado g’yod kay momahal man ang kantidad sa mga palaliton.

Niadtong miaging udto, duna ko’y tiguwang nga nakadungan og kaon sa aseras nga akong suki nga kan-anan.

Nalooy ko sa tiguwang kay usa ra kan-on ug buwad ang gipaniudto, dayon nangayo’g tubig.

Nasabot nako nga apike g’yod tawon sa budget ang maong tiguwang mao nga pagdayon niyang tindog, gitunolan nako og P50. Lipay tawon kaayo ang tiguwang.

Ingon niana ang kahimtang karon sa kinabag-ang katawhan, ilabi na niadtong mga walay klaro nga trabaho.

* * *

Nakadawat ko og kopya sa suwat ni magpapatigayon Efrain Pelaez nga migamit sa logo sa Ombudsman pagpadala niya og awhag sa mga opisyal sa kagamhanan pagpangayo og mga dukomento.

Buyno, ang pagpangayo og dukomento aron pagtabang nga masuta kun dunay mga binuang nga transaksyon sa kagamhanan, dili illegal. Mao kini ang sagad namo nga buhaton isip sakop sa media.

Bisan dili sakop sa media makahimo pagpangayo’g kopya sa mga dukomento nga dili maglambigit og “security of the state.”

Gidayeg nako niini si Mr. Pelaez, ang wala magustohi sa kadaghanan, mao ang paggamit niya sa logo sa Ombudsman.

Bisan og ang iyang grupo usa ka accredited graft watch unit sa Ombudsman, apan dili mahimong sayon-sayonon lang niya paggamit ang maong logo sa iyang mga kumunikasyon.

Si Deputy Ombudsman Pelagio Apostol mihatag g’yod niining maong baruganan dihang gikuhaan og pamahayag sa mga sakop sa media.

Maayo unta og ipadayon ni Mr. Pelaez ang iyang kawsa, apan dili na lang siya mogamit sa logo sa Ombudsman nga maoy posibleng makapabarato sa maong ahensya.

Ang mogamit niini mao ra g’yod ang Ombudsman ug dili na ang mga accredited graft watch unit.

Makuyawan ko nga ang gihimo sa grupo ni Mr. Pelaez sundon usab sa ubang graft watch unit, ang Ombudsman mahisama unya sa Criminal Investigation and Intelligence Bureau diri sa dakbayan nga nabarato pag-ayo kay giuran-uran na lang sa ilang mga asset ang mga T-shirt nga ilang uniporme.

* * *

Nalipay ko kay wala na g’yod tawon magsaba-saba kadtong usa ka lumulopyo sa luyong bahin sa Marco Polo Hotel nga matag Sabado mogamit og amplifier sa pagsangyaw niya sa pulong sa Dios.

Nakasabot g’yod tingali siya sa kalihitimo lang usab sa reklamo sa iyang mga silingan. Salamat kayo Sir ha?

Akong klarohon, walay nagpugong nimo pagsangyaw sa pulong sa Dios, apan ayaw na lang gamiti og loud speaker.