Ang sagpa ni Boy Radaza

Gipasanginlan si Mayor Boy Radaza ni Ephraim Pelaez Jr., presidente sa Mactan Island Chamber of Commerce and Industry, mga kauban niini ug sa iyang mga kritiko
nga dili mahigalaon ngadto sa mga magpapatigayon sa dakbayan sa Lapulapu. Gipasanginlan usab siya nga nangilkil sa mga magpapatigayon nga mibubo na ug niadtong boot pang mobubo og pohonan sa dakbayan.Usa ka mayor nga kritiko ni Boy Radaza mipasangil nga grabi kaayong mangwarta ang Lapulapu ngadto sa mga magpapatigayon. Nga sa ato pa gasto kaayo kun magtukod ka og patigayon sa dakbayan sa Lapulapu. Apan kaniadtong miaging semana migawas nga sa gipahigayong pagtuon sa Asian Institute of Management sa pakigtambayayong sa Canadian ug Australian Government,International Finance Corporation, World Bank ug Department of Trade and Industry nga ang Lapulapu nag-una sa mga dakbayan nga gamay ra ang gikinahanglang pohonan sa pagsugod og patigayon, ikaduha sa mga dakbayan nga gamay lang ang mga pamaagi nga sundon sa pagsugod og patigayon, ug ika-unom sa mga dakbayan nga pila lang ka adlaw makasugod ka na sa imong patigayon. Sigun sa maong pagtoon, sa 21 ka mga dakbayan sa tibuok nasud sa Pilipinas, ang Lapulapu nahimutang sa ikaduhang dapit, nagsunod kini sa Taguig base sa nahisgutang mga kategoriya.

Kining maong resulta sa pagtuon sagpa kini ni Mayor Boy Radaza ngadto sa iyang mga kritiko ug budhi sa mga sakop ni Pelaez ngadto kaniya.

Aray! Pagkasakit! Tan-aw ko murag nalipong si Mr. Pelaez ug mga kaubanan, niining maong resulta sa pagtuon sa mga dagkong institution nga sukwahi sa ilang mga pasangil.

Sa nahisgutang pagtuon natural lang nga ang mga respondents niini mao kadtong mga magpapatigayon diha sa dakbayan sa Lapulapu nga labing seguro mga sakop ra usab sa kahugpungan nga gipangulohan ni Mr. Ephraim Pelaez Jr., ug kay ang resulta pabor man ni Mayor Boy Radaza buot bang ipasabot niini nga wa tuohi si Pelaez sa iyang mga sakop o gibudhian siya nila?