Pait pas panyawan

Naunsa na man intawon ning atong kahimtang karong panahona uy!

Nasagmuyo g’yod kaayo ko dihang nadungog nako sa DYLA Balita kagahapon nga lain na usab nga usbaw sa presyo sa petroleum products ang gipatuman.

Ang una nakong nadungog mao nga ang mga liquefied petroleum gas (LPG) giusbawan, apan taud-taud gipahibalo na usab nga apil diay ang gasoline, krudo ug ubang petroleum products.

Sa ato pa, ang presyo sa matag litro sa gasolina miabut na og hapit P55 ug P47 ang diesel.

Palihug intawon, kamong mga nagdumala sa nasud gikan ni Presidente Arroyo tagda ninyo nga masulbad ug maiban-ibanan ang problema sa pagsaka sa presyo sa mga palitonon.

Kami gani nga nagdawat og arang-arang nga sweldo naglisud man, unsa pa kaha ang uban no?

* * *

Pagsuwat nako niining maong lindog, diha ko sa beranda sa akong balay nga nag-umbaw sa kinaubsan sa barangay Apas.

Kusug kaayo ang pagbunok sa uwan nga giubanan usahay sa hangin, dungan sa masipa nga liti, kilat ug dogdog.

Kalit lang misantop sa akong kaisipan ang kahimtang sa mga igsoon nato nga anaa magpuyo sa humok nga dapit sa kabukiran.

Buyno, pareho man kami nga mga kabus nga ania magpuyo sa bukid, awhagon na lang nako sila nga siguroon nga lig-on ang pundasyon sa balay.

* * *

Daghang mga sagbot anaa ra gilabay sa karsada ug ang atong mga opisyal sa kabarangayan wala makasanta sa maong binuhatan.

Diri hinoon sa bag-o nakong gipuy-an duol sa Marco Polo Plaza Hotel, wala g’yoy lunop diri kay bukid.

Apan dili g’yod nako kalikayan nga mahinumdom ko dihang nagpuyo pa ako sa barangay Lorega-San Miguel nga utro pa nga wala maatiman sa mga opisyal ang problema.

Dili ra kay sa Lorega-San Miguel nagtapun-og ang mga basura, apil na diha sa barangay Day-as, dapit sa Zapatera Elementary School.

Kun ang kusog nga uwan nga nasinati diri sa Apas ug Busay kagahapon miigo pa usab sa Day-as, ang ubang sagbot gibanlas ug nahipunta sa mga drainage system ug kadtong mga nagpuyo duol sa kasapaan mao intawon ang nag-antos nga nalunopan ang ilang kabalayan.

* * *

Wala masayop si Dr. Lorna Rances, ang public schools superintendent dinhi sa dakbayan sa Sugbo, sa iyang pagtoo nga modaghan g’yod ang mga tinun-an sa mga public schools karong tuiga.

Husto ang iyang pangagpas nga tungod kay ang ubang private schools mipausbaw man sa bayranan sa ilang matrikula, ang ubang ginikanan adto na mopatungha sa ilang kabataan sa mga public schools.

* * *

Awhagon g’yod nako ang mga konsehal dinhi sa dakbayan, ang mga sakop sa provincial board, nga magmugna mo og ordinansa nga magdili sa pagsul-ob og mga  uniporme sa mga tinugyanan sa balaud sa mga walay labot.

Dihang didto pa ko madistino sa Kapitolyo kaniadto, nahinumdom ko nga dunay ordinansa ang probinsya kabahin niini, apan nalimtan na lang.

Wala g’yod ko makagusto nga bisan dili polis, dili militar, apan magsul-ob og sapot nga sama sa ilang uniporme.

Ayaw na lang mo’g pangutana kun nganong dili ko gusto. Gamita na lang ang inyong sentido komon.