Maayo bang piyansahan dayon ang dinakpan?

Gilatid sa atong balaod nga mahimong piyansahan dayon ang dinakpan aron makapahimulos siya sa temporaryong kagawasan o sa gawasnong kinabuhi samtang magpaabot siya sa iyang hearing o husay sa iyang kaso.

Apan ang  mga krimen sama sa murder, rape, tulis-patay, shabu syndicate ug large-scale illegal recruitment walay piyansa kay giisip man sila  nga  mga heinous crimes.

Mangutana kita: Maayo bang piyansahan dayon ang dinakpan karong panahona? Ang tubag niini nga dili maayo tungod kay si Ricoly Igoy bag-o pa lang gyud nga nakapiyansa didto sa korte sa Carcar city, giihaw dayon diha sa Pakigne, Minglanilla uban sa drayber nga taga-Medellin dili pa lang dugay.

Ikaduha, ang mga suspetsado sa 'Budol-Budol' gang  nga sila si Evelyn Magno, Jose Mecias Magno lakip na ang 'tomboy' gilikidar usab diha sa Kalunasan ug ang drayber nga si Henry Comanao naapil usab. Karong bag-o, usa na usab ka suspetsado sa robbery ang gipusil didto sa Toledo City.

Mao kini ang mga dugoon ug makapanlimbawot sa balahibo nga mga panghitabo dinhi sa Sugbu sa miaging mga adlaw.

Sa nahisgotang pagpamatay, walay bisan usa lang ka buok ang nadakpan sa mga otoridad. Balaod na karon sa armas ug pistola ang mipatigbabaw ug naghari sa atong dapit.

Dili maayong piyansahan dayon ang akusado. Kinahanglan nga maniid mentras-tanto kita sa lakat sa atong panahon.

Usik  ug hasol ra kaayo ang salapi nga ipiyansa kay sa himanhiman hiposon man lang diay sa walay langan-langan.

Maayo pang magpabilin lang una sa prisohan kay kun unsay mahitabo, aduna pay kapangitaan ang tagtungod sama sa mga guwardiya ug warden. Di ba?