Mga way trabaho ug gagmay'g sweldo

Moabri na sad ang ekswela. Manungha na sad ang atong mga batan-on. Sa pagdahom nga inig gradwar nila, anaay maayong trabaho ang naghulat kanila nga maoy makapahatag og maayong kaugmaon ug siguridad sa kinabuhi.

Mao sab kini ang panglantaw kaniadto sa akong kaila nga si Julio. Naningkamot pag-ayo si Julio aron makatungha sa kursong AB Political Science. Dagko ang iyang grado sa unibersidad ug midaug siya sa mga kontes sa debate tungod kay maayo siya manabi ug kanunay siyang nagtuon sa mga isyu. Paghuman niyag gradwar, misulod pa gyud siyag kursong abogasiya. Apan tungod lagi kay naminyo man siya sa ikaduha niyang tuig sa maong kurso, gikinahanglan mangita siya og trabaho. Ug mao kadto nga nisulod siya isip clerk sa opisina sa usa ka politiko. Bisan wala niya matiwas ang iyang abogasiya, mas taas gihapon siyag na-eskuylahan kay unom gud tanan ka tuig.

Apan ubos kaayo ang iyang sweldo. Nahadlok siya nga kun dili modaug ang iyang amo karong sunod eleksyon, mawad-an na gyud siyag trabaho. Hinoon, maayo nalang kini kun ikomparar sa iyang igsoon nga walay trabaho. Gradwado si Manang Ethel niya sa kursong Med Tech. Wala kini makakitag trabaho nga tugma sa iyang kurso. Nahimo kining promo girl sa department store, hangtod nga naminyo sa ilang bagger nga si Elmo, kinsa nakatungtong usab sa ikatulong tuig sa Marine Biology. Pagkahumag panganak sa iyang panganay, misulay si Ethel pagpangaplay sa mga opisina, apan tungod kay wala kini kasinatian sa computer, wala kini madawat. Nagplano na lang siya nga inig kadako-dako sa iyang anak, mo-apply siya isip domestic helper sa gawas sa nasud, aron ma-preparahan ang galastohan unya kun mo-eskuyla na ang iyang anak.

Daghan ang atong propesyonal ug mga gradwado. Apan nagpabilin gihapong ubay-ubay kanila ang gagmay og sweldo o ba kaha wala gyuy trabaho. Kun makatrabaho man gani, gikinahanglan pang molangyaw sa gawas sa nasud, apan kasagaran ang ilang kurso dili gyud magamit.

Usahay man gud ganahan tang mokuha anang kurso nga nindot ug prestihiyosong paminawon. Apan pipila man lang ang trabahong nagkinahanglan niini? Hapit kada Domingo makabasa kita niining mga kompaniya, kasagaran mga call center, nga nagpahibalo sa ilang panginahanglan og mga trabahante, apan nganong hangtod karon daghan mang wala gihapoy trabaho? Gani nakadungog kog estorya nga tungod kay kulang kaayo sila sa tawo dinhi, adto kuno sila mangitag puno nga mga trabahante sa India.

Sa kadaghang eskuylahan dinhi sa Pilipinas, gamay lang kaayo ang nakakab-ot sa standard nga gikinahanglan sa mga dagkong kompaniya. Kulang ang pundo sa edukasyon ug ang standard dili igo aron mamahimo kitang ibangga sa kompetisyon sa kalibutan. Ang mga pamaagi kinaraan pa kaayo. Ang mga kurso dili haum sa panginahanglan. Sayang kay daghan  kitag talento sa ato. Usahay usik ang panahon sa estudyante nga mokab-ot sa kurso nga dili diay niya magamit. Usahay, kining kasagmuyo sa atong mga katawhan sa kakulang sa oportunidad nga makatrabaho, o makaeskuyla sa maayong eskuylahan, mao usahay ang hinungdan niining mga shortcut nga nahitabo: mga babaye nga mangita nalang og tawong makahatag kanila og kwarta baylo ang ilang lawas, o mga tawong modangop na lang sa illegal nga binuhatan aron maka-kwarta. Ug kay nasugdan na man kini, nahadlok kita nga mamahimo na kining cycle o kultura.

Alang sa inyong mga panahom, palihug email sa [email protected]. Daghang salamat.