Daghang salamat. O Birhen Maria Sa Flores de Mayo Sagakaya Mga Pangaliyupo

Bulan sa Mayo, mga pagyukbo'g pagpasidungog nga tim-os,  ngadto's Mahal nga Birhen, Inahan sa Diyos, ngadto Kaniya kinasingkasing ihalad tang bug-os, nga  sagupon unta Niya kining atong pagpakilimos.

Mahal nga Birhen sa kalooy, intawon batia na among mga dangoyngoy, Kanimo kami sa kanunay modangop, kay Ikaw man Inahan nga maaghop.

Ang Flores de Mayo sa tanan gayod gisagop, mga paghalad ug pasalamat sa kasingkasing Mong ma-aghop, mga kabata-an, kabatan-onan lakip na ang mga tigulang, Ikaw Mahal nga Senyora, tiunay'ng gihalaran.

Mga bulak sa pangaliya, Kanimo Mahal nga Birhen among igasa, intawon Inahan mga kahasol sagupa, labi na ning among panggobyernong problema. Salamat Inahan sa Imong mga kaayo intawon ihikaw ayaw Inahanon Mong kalumo, labi na ning amo karong panggobyerno, nga labihan na gayod intawon kahugno.

Salamat Mahal namong Inahan, intawon sagakaya usab among mga kaparian, nga unta magmalig-on sila kanunay, ning katungdanang ilang gipanumpa-an sa Langitnong Amahan!

Daghang salamat Mahal nga Senyora, ning kahigayonan sa Imong pag-amoma, sa kanunay Ikaw unta kanamo mosapupo, ug sa gihapon patalinghugan Mo among mga pag-ampo.