Positibo na pud...

Giisip nga abaw pa sa lalaki ang abilidad ni Presidente Gloria Macapagal Arroyo. Ug sa sunod-sunod nga pagkuha sa balita sa ika-duha sa labing may taas nga terminong lider sa nasud, akong na-obserbahan ang mga butang nga nakalahi kang PGMA itandi sa mga nanglabay nga presidente ning bag-ong panahon. Kung naputos sa daghang kontrobersiya ang iyang pamunuan gikan sa pagka-lehitimo sa iyang katungdanan hangtud na sa binilyon ka pesos nga mga proyekto nga giingong adunay dakong nabulsa ang iyang mga kaalyado ug posible siya usab mismo, buot nakong ipa-ambit ang mga positibong obserbasyon nga akong nakit-an sa mga panahon sa atong pag-cover sa babayeng presidente.

Una, ana-a sa tukmang oras ug usahay mas sayo pa sa gitakdang oras kung moabot si Arroyo sa mga kalihukan nga iyang tambungan. Usa sa labing bag-o ang iyang pagtambong sa groundbreaking ceremony sa itukod nga dugang edipisyo sa Philippine Science High School sa lungsod sa Argao. Gitakdang moabot ang presidente ala una sa hapon. Apan singko minutos sa wa’ pa ang gitakdang oras, niabot na sa lugar ang presidente ug nakiglamano sa mga tawo nga nagpaabot kaniya dayon sugod sa seremonyas sa paghu’g sa time capsule sa maong proyekto. Ang resulta, ang mayor lang sa lungsod sa Argao ang nakaabot sa maong okasyon. Uban nga lokal nga opisyal ug mga kongresista, uwahi na dihang nagdangarag paingon sa lugar.

Bisan sa iyang pagduaw sa Bohol sa miaging adlaw, ana-a sab sa tukmang oras ang presidente. Ug mao ni usa sa mga butang nga nakalahi ni Arroyo itandi sa ubang mga opisyal sa gobyerno nga murag si kinsang langayan kaayo ug ingon og gibaliwa’ lang ang mga nagpaabot nga katawhan. Usa ka maayong ehemplo ning gihimo sa presidente nga wa’ pa makatakod sa daghan pang politiko sa nasud nga pirting pagkalangayan ug pagka-usikan og oras o panahon. Si Arroyo ang usa ka lider nga di’ gusto og daghang arte ug mga seremonyas sa iyang kaugalingon sa pagduaw sa usa ka dapit. Kung ang mga tawo nga kanunay nga nagsunod-sunod kaniya sama sa Presidential Management Staff, karon pa sila makasuway og presidente nga usahay mas na-una pang andam itandi nila sa pagduaw sa usa ka dapit.

Ikaduha, si Arroyo ang presidente nga di’ gusto og unya-unyaon ang trabaho o katungdanan. Kung unsay mahimo sa labing mas daling panahon aron pagsolbad sa problema ug pagpatuman sa proyekto, iya kanang buhaton. Iyang gi-kwestyon ang mga opisyal nga nagpaluyo sa katukuran sa Panglao International Airport kun nganong sa Disyembre pa kasugdan ang proyekto nga andam naman unta ang pundo ug pabor naman ang mga tawo nga nag-okupa sa mga luna nga malakip sa proyekto. Buot sa presidente nga kasugdan ang proyekto sa mas daling panahon aron kun mahimo, mas dali  ning kapahimuslan alang sa kalambuan.

Susamang obserbasyon sab ang nakita atol sa cabinet meeting sa isla sa Panglao kung diin ang isyu sa kuryente ang gihisgutan. Atubangan sa media, gisabunan ni Arroyo ang mga taga Dept. of Energy tungod sa isyu sa power reserve ug power shortage nga nasinati sa mga probinsya sa Kabisay-an. Ang maong lakang sa presidente ang nahimong sentro ug nagpakita sa iyang pagkapuno sa hibawo sa mga isyu ug problemang gisagubang sa iyang gobyerno lakip na ang solusyon nga pwedeng matugkad. Atubangan sa mga sakop sa iyang gabinite nga halos tanan pulos lalaki, gipakita ni Arroyo unsay iyang abilidad sa pakig-diskusyon ug pakig-debate aron makab-ot ang mas malungtarong solusyon sa problema.

Apan ang tanan nga mga maayong ‘work ethics’ o maayong gawi sa pagtrabaho pwedeng matabunan o mabuling-bulingan sa daghang isyu ug akusasyon nga atubangon sa usa ka lider. Bisan pa kung maayo ang relasyon niya sa mga kaubang opisyal o mas sayon ug dali siyang ika-trabaho, pwede mapapas ang tanan kung isyu na sa kredibilidad o integridad ang mabutang sa dakong peligro. Ug mao ni nahitabo sa presidenteng giingong kugihan ug puno sa abilidad kung sa pikas bahin naputos sa isyu sa pagpanikas ug korapsyon. Mas dali rang mapapas ang mga maayong nahimo  sa usa ka tawo sa usa ka kasaypanan nga iyang nahimo.