Tunga-tunga sa pagtuki sa taga liog nga presyo sa kuryente didto sa Metro Manila, nigawas ang usa ka nagpailang ‘Alex’ bitbit ang mga litrato ni Presidente Arroyo didto sa China. Giingong nagduwa og golf ang presidente kauban ang mga opisyal sa kontrobersiyal nga ZTE. Daghan ang ni kwestyon sa maong hulagway tungod kay nakuha ang litrato lima ka buwan sa wa’ pa lagdai ang ZTE deal. Daghan ang ni-kwestyon tungod sa pagpaduaw sa presidente sa usa ka lugar nga iya sa mga kompaniyang ni-bid sa usa ka binilyong proyekto. Labaw nga gi-kwestyon sa oposisyon ang pagpresentar sa presidente nga wa’ man lang gani magpasabot sa publiko.
Kini karon ang gisaw-ang isyu sa bag-ong pahina sa pagtuki sa usa sa labing dakong isyung gisagpa sa administrasyon. Apan karong nagka-interes na ang senado sa pag-kuha sa testimoniya ni Alex, nagplano ang bag-ong testigo sa pag-atras nalang tungod sa kahadlok nga may dautang mahitabo kaniya ug sa iyang pamilya. Karon, nabutang sa wa’ na say kasigurohan ang bag-ong mga pasangil tungod sa kalit nga desisyon sa usa ka testigo nga tapuson ang iyang kanta sa di’ pa moabot sa punto nga mamahimong yabag alang sa publikong nagpaabot sa iyang pagkanta sa senado. Di’ na bag-o ang mga akusasyon sa kasamtangang administrasyon. Kung nakalusot si Arroyo sa labing dakong isyu sa ‘hello Garci’, sisiw ra ang mga akusasyon nga nanglusot karon ug uban pang mga isyung motumaw sa sunod nga mga buwan hangtud nga mahuman ang iyang pamunuan sa 2010. Kung aduna man gani butang nga angayan nga ikapasigarbo ang kasamtangang administrasyon, kana mao ang pagsolbad sa mga krisis ug kontrobersiya sa malinawon ug plantsadong paagi. Kung aduna may dakong butang nga ikapasigarbo ang kasamtangang pamunuan kana mao ang pagduwa sa matag isyu nga mogawas nga malampuson ug padayong naghupot sa pwesto bisan pa sa panawagan sa pagpakanaog. Nakalusot man gani sa isyu sa pagpanikas aron pagdaog sa miaging eleksyon, ang pagbato paba sa ubang akusasyon ang di’ mahimong kalutsan.
Apan asa man nag-ugat ang problema? Kini maoy pangutana sa mga tigpaminaw sa akong programa sa DYAB matag Sabado sa alas says sa buntag. Sa makadaghang higayon, ako nang gibalik-balik nga kung aduna man gani tay mabasol ining tanan, kana mao ang wa’ nato paggamit sa labing dakong gahum nga gitugyan kanato atol sa adlaw sa piniliay. Ang eleksyon lang ang nag-inusarang kalihukan nga naghatag og patas nga katungod ug kagawasan sa matag kwalipikadong botante. Maadunahan man o makabus, may impluwensya man o ordinaryong tawo, may posisyon man sa katilingban o tawo nga nagpuyo sa labing suok nga dapit, ang tanan adunay patas nga katungod sa pagpili sa mga opisyal sa atong nasud. Apan pait palandungon nga ang maong katungod kanunay pang mapahiran og pagpanikas, ibaligya bugti sa gamay nga kantidad ug mabutang sa wa’y bili tungod sa pagmaniobra sa tanan.
Niabot na ang punto nga halos maparot na ang pagsalig sa katawhan sa kasamtangang gobyerno. Hapit na mabugto ang pagsalig nga moabot pa ang panahon alang sa malungtarong kalambuan. Duol na ang adlaw nga halos mapuno na sa wala ug tuong isyu ang katawhan ug nabutang sa dakong kwestyon kinsa ang nagsulti sa matuod ug kinsay angayan nga tuhuan. Sa kadaghan nang administrasyon ang nangagi ug naghupot sa katungdanan, susamang problema gihapon ang atong giatubang—kakabus. Kung sa panahon ni Marcos, kakabus ang nag-unang problema, karon mao ra gihapon ni problemang gi-atubang sa kasamtangang pamunuan. Kung kaniadto, ang pangurakot ang nag-unang hinungdan sa grabeng pag-ot-ot sa pagpuyo sa mga Pinoy, karon mao ra gihapon ni ang nakitang hinungdan. Kung buot huna-hunaon, way naabtan ning maong nasud sa pagsolbad sa problema ug pagpukan sa nag-unang hinungdan sa problema.
Karon, nanawagan ang publiko ug silot alang sa mga opisyal sa gobyerno nga nalambigit sa korapsyon ug pagpangawat. Apan mabati ba ang maong panawagan kung mismong ahensya ug institusyon sa gobyerno nga mangita og hustisya mao ang nagpasiugda o nagpaluyo sa korapsyon. Karon ang panahon kung diin naglibog na ta unsa ang tinuod sa bakak, unsa ang matarong sa kahiwian ug unsay tukma sa unsay sayop. Ug hangtud nga may kausaban mismo su’d sa atong gobyerno, walay padulngan ning maong nga nasud apan pagpamintaha ug pag-abuso sa katungod.