Kapugngan ba's Ombudsman?

Mireklamo ang pamilya sa mahuyang nga pasyente sa Vicente Sotto Memorial Medical Center nganong gibutyag sa mga sakop sa media ang iyang ngalan sa publiko. Usa sa mikisi-kisi gawas sa nangangkong biktima nga si Genaro Jorolan mao ang kapitan nga si Dave Tumulak. Ilang plano nga ilang awhagon karong adlawa ang Ombudsman nga momando sa mga sakop sa media nga di hinganlan si Jorolan.

Ilang rason mao nga biktima sa pagpanglugos si Jorolan busa angayang protehian ang iyang pagkatawo nga di mabulgar. Matud ni Tumulak nga dunay responsibilidad ang mga sakop sa media pagprotehir sa pagkatawo sa mga biktima sa pagpanglugos. Ang pangutana, tinud-anay ba gyung biktima si Jorolan sa pagpanglugos? Hain man ang kasong rape? kinsa may naglugos niya?

Ang unang report maylabot sa nahitabo kang Jorolan mao nga duna siyay lalaki nga gikahimamat ug gikasabot nga makighilawas niadtong bisperas sa bag-ong tuig. Apan tungod sa matud pa pagbiay-biay sa mahuyang sa gidak-on sa kinatawo sa lalaki nga iyang gikaparis, giintirisan siya ug gibinlan og sudlanan sa perfume ang iyang sampot. Ang pangutana, duna bay lugos nga nahitabo nga ila man nga sinabutan ang ilang gihimo? Kun tinud-anay man nga gilugos si Jorolan nganong wa man siyay tinguha paggukod sa naglugos niya?

Nganong mas mahinungdanon man hinuon alang niya ang pagpanggukod sa mga doktor ug nurses sa Vicente Sotto Memorial Medical Center nga maoy nagluwas sa iyang kinabuhi pinaagi sa pagkuha sa bayanan sa perfume nga niungot didto sa iyang sampot inay nga gukdon ug pangita-on ang naghimo niya sa ingon aron taralon sa hukmanan? Ang bugtong sayop sa mga mananambal ug nurses sa VSMMC mao lang gyud ang ilang pagbugal-bugal.

Mas bug-at pa ba diay alang ni Jorolan nga masilutan ang nagbugal-bugal niya kay sa tawo nga nag-among among niya? Di kapangangkong biktima si Jorolan sa pagpanglugos kun siya mismo wa gani’y interest nga ikiha ang tawo nga naglugos niya, kun tinuod man. Busa alang nako, di sab mahimong pugngan ang media nga ibutyag ang iyang pangalan. Kabahin sa ilang plano nga awhagon ang ombudsman nga did-an ang media, nasayod si Kapitan Dave Tumulak nga di ni mahimo sa ombudsman.

Unsa may gahom sa ombudsman nga pugngan ang media? Bisan ang atong gobiyerno di basta-basta nga makapugong sa media gawas kun duna gyuy igo nga basihanan tungod kay protektado ang katungod sa media diha sa Batakang Balaud. Kataw-anan ug alang nako nagpa-ila sa ilang ka irihis ang mga nagplano nga modangop sa Ombudsman aron pugngan ang media paghingalan ni Jorolan tungod kay wa’y gahum ang ombudsman paghimo niini

* * *

[email protected]