Wala gyud mahimuot ug malipay ang mga empleyado sa mga pribadong buhatan sa atong nasud mahitungod sa 'contractualization' sa ilang pagpanarbaho alang sa ilang kabuhian.
Ngano man? Tungod kay kasagaran nila kutob ra sa lima ka bulan kay maglikay man ang tag-iya kon management nga dili sila mahimong permanent kon regular employees.
Kay ang regular or permanent employees god daghan na man og mga benepisyo nga madawat ug dako usab ang kantidad nga salapi ang ilang mabawon panahon sa inigretiro na nila gikan sa ilang trabaho.
Mahinumdoman, si kanhi Senador Efren 'Boy' Herrera ang utok ug nangamahan sa gikasilagan nga contractualization bill.
Mao kanay usa sa mga rason kon katarungan sa pagkahugno niya sa karera sa politika. Mangutana kita: Maayo bang wagtangon ang contractualization law?
Ang tubag niini mao nga kinahanglan nga wagtangon sa hingpit ang contractualization law tungod kay wala gyuy chance o paglaom ba hinoon nga mahimong regular o permanent ang usa ka empleyado sa pribadong buhatan.
Magsige lang siya og pangita og trabaho matag lima ka bulan. Walay kasegurohan ang kahimtang sa iyang pamilya ug mga anak taliwala sa kalisod sa atong panahon karon ilabi na gyud nga misulbong ang presyo sa bugas ngadto sa kapunawpunawan.
Dili siya makahatag og maayong ugma ngadto sa iyang mga anak kay contractual man siya kansang trabaho molungtad lang ngadto sa lima ka bulan.
Busa, kinahanglan gyud nga wagtangon ang contractualization law karong panahona. Di ba?