Maayo ba ang ‘simple living’ karon?

Daghan sa atong mga kaigsoonan karon nag-antos og nag-ilaid sa hilabihang pag-usbaw sa presyo sa bugas humay ug mais inubanan usab sa kamahal sa presyo sa karne ug uban pang mga palaliton sa merkado o tiyanggihan.

Mao usab ang gibati sa mga nagtrabaho sa pribado ug gobiyerno kay mao pa man gihapon ang ilang suweldo kay gituki pa ang ilang mga umento sa atong kagamhanan.

Gawas sa presyo sa mga palaliton, mousbaw usab ang ‘tuition fee’ kon balayranan sa kolehiyo karong ting-abli sa klase sa Hunyo pohon.

Unsa may sulbad kon solusyon sa atong kahimtang karon? Usa sa pagsulbad sa ekonomikanhong krisis sa atong nasud mao ang “simple living” kon yano nga pagpuyo.

Kunhoran na ug wagtangon sa hingpit ang pagsigig gasto sa walay pulos nga mga bisyo sama sa inom, sugal ug panigarilyo.

Imbis ang salapi nga alang niining mga butanga ipalit nalang sa bugas ug sud-an alang sa pamilya.

Importante karong panahona mao ang pagkaon nato kada-adlaw. Ikaduha, kinahanglan nga mangita kita og ‘sideline” karong panahona basin na lang makaabag-abag kana sa atong pagpuyo.

Importante ang ‘sideline’ ilabi na kun gamay ra kaayo ang atong suweldo. Ikatulo, kanunay gyod kitang mag-ampo sa Diyos ug sayo usab kitang momata matag buntag aron makahunahuna kita og maayo.

Husto si anhing Presidente Ramon Magsaysay kaniadto nga simple living is the best way to success and prosperity kay dili na man unya molabaw ang atong spending kun itandi sa atong income kun never spend more than what you earn!