"Good morning, Sir. Kana bang mga boring diha sa Colon, wala man gyoy nakabuyag niana nila. Magsige man gyod og pamugos. Bisan og dili ta mogamit nila magsigeg panghagad. Dili ko ganahan nga naa sila diha. Disturbo sa mga tawo nga mangagi." -- 0910-2217038 (Sent: 10:48:45am--April 13, 2008)
* * *
Sa akong pagsabot sa text sa atong texter, morag naeskandalo siya sa gibuhat sa mga burikat diha sa Colon nga manghagad sa ilang kaugalingon ngadto sa mga lalaki nga mahitaak dihang dapita.
Nakasabot ko sa atong texter. Tinuod bitaw nga samokan ug maeskandalo gyod ta nianang mga burikat nga magsigeg panghagad ug mamugos pa gani gyod, kana lagi kun wala tay intensiyon nga mogamit nila alang sa hamubong kalipay nga binayran.
Apan alang niadtong mogamit og kinilo, kalipay nila nga naay burikat nga manghagad. Kana pa bay pangitaon, matud pa.
* * *
Bitaw, usa nako ka higala nga taga Quiot misugilon nako nga naa gyoy presensiya sa mga burikat diha sa Colon panahon sa kagabhion. Kining akong higala mo-duty sa iyang gitrabahoan inig kahapon ug kaadlawon nang mopauli sa Quiot. Samtang magpaabot siyag kasakyan diha sa eskina sa Colon ug Osmeña Boulevard, naa poy mga burikat nga magpunay og panghagad niya. Magkapuliki intawon og balibad ning buotan kong amigo.Angay gyod ning aksiyonan sa proper authorities, uy. Hain na man tong ilang Oplan Magdalena?
* * *
Daghan kog nadawat nga text reklamo nga dinhi sa dagbayan sa Sugbu, daghan kaayong mga tambalanan nga miyano-yano paglapas sa Republic Act 9439 kon Hospital Detention Law.
Sama pananglit sa reklamo sa naggamit sa cellphone no. 0928-3046774 nga mi-text nako niadtong Abril 13, 2008 (Sent: 08:07:14pm). Ang iyang pag-umangkon nga nanganak puyde na untang mogawas sa hospital sa gobiyerno pero kay kulang ang ilang bayad, wala pirmahi ang "clearance" sa pasyente. Puwerte ra ba kunong mahala. Wala kagawas ang pasyente.
Dili ba matawag man kini nga illegal nga practice base sa R.A. 9439? Nangutana lang ko!
(Sumbong ug reklamo? Text sa 0910-8105522).
