Daghan kong nabasahan nga kaso mahitungod sa kasong pagpanglugos sa uyab. Posible kining mahitabo. Dili buot ipasabot nga tungod kay manag-uyab ang duha ka binuhat, mahimong buhaton sa usa ngadto sa iyang uyab ang pakighilawas sa walay pagtugot o kontra sa kabubut-on niini ug sa pinugos nga paagi.
Matod pa sa akong kaila, dili sab kuno buot ipasabot nga kun nakig-date ang usa ka babaye, mosugot na kini sa giingong “all the way”. Matod pa niya, usahay adunay mga uyab nga assuming ra kaayo ug kulang sa pagrespetar nga mamugos sa unsay nasulod sa ilang hunahuna. Kining termino nga “date rape” o pagpanglugos samtang ang duha ka nilalang nag-date, napagya kini dihang ang usa ka inilang personalidad sa Estados Unidos gikiha sa pagpanglugos sa iyang ka –date.
Kadaghanan sa atong mga batan-on karon, dili makamaong mo “behave” samtang mag-date. Adunay mga babaye nga dili makapadayag kun unsay ilang mga ekspektasyon sa usag usa. Aduna say mga lalaki nga dili makamaong mobasa kun hain lang dapit ang pwede ug hain dapit ang dili pwede. Aduna say nagtoo nga kun makig-date ang babaye, mosugot kini sa tanan nilang buhaton, ug kun mobalibad kini, buot ipasabot nga wala kini mahigugma o nagpadiki-diki lang apan maoy gusto.
Kasagaran sa mga pamilya, wala gitudlo sa ginikanan ang hustong paglugar sa kaugalingon kun mag-date. Wala gitudlo sa eskuylahan ang maayong pamatasan sa date o pakig-uyab. Kun ang ginikanan walay salig sa ilang anak o sa ka-date niini, ila kining paubanan og chaperone, o ba kaha dili tugotan nga makig-date. Ang resulta, ang pakig-date nahimong tinago-tago ug ang duha ka batan-on dili andam o wala makahibalo unsay angayan nga buhaton sa usa ka date. Usahay ang mga sulti-sulti ug hambog-hambog sa otro sang walay buot nilang mga barkada maoy ilang sundon. Usahay kini maoy hinungdan sa mga kasong pagpanglugos sa uyab.
Ang usa ka anak mag-agi sa usa ka panahon sa iyang kinabuhi diin madani na siya sa laing nilalang ug mosuway sa pagpakig-relasyon. Gikinahanglan niya ang giya sa insaktong panglihok-lihok ug gikinahanglan niya ang pagkat-on sa paghusgar kun unsay angayan ug unsay dili angayan. Apan adunay mga ginikanan nga buta ug bungol niini. Gani, duna gyuy ubang masuko. Abi tingali nila nga ang ilang kasuko makausab o makapawala niining unibersal nga phenomenon nga mao ang pag-uyab-uyab. Tingali tungod kay sila mismo dili andam nga modawat nga dili na baby ang ilang anak ug natigulang na gyud sila. O tingali tungod kay sila mismo wala makahibalo sa ilang buhaton kay wala nila maagii ang pormal nga pakig-date ug pakig-relasyon.
Sa panag-date, importante sa duha ka manag-uyab nga magklarohay sa ilang mga ekspektasyon. Importante usab sa mga babaye nga makamao nga mo-insister kun unsay dili nila gusto, ug dili kay pahumok-humok lang sad ang ilong unya kontra diay sa kabubut-on o dili diay siya andam. Pananglitan, dili kinahanglan nga moadto sa laing lugar human manan-aw og sine, kun sine ray sabot. Kun dili, magpadayon ang pagsaka sa gidaghanon sa mga kasong date-rape kon pagpanglugos sa uyab.
Alang sa inyong mga panahom, palihug email sa hinuktoki@gmail.com. Daghang salamat.