Nagpadayon ang ‘on-line voting’ alang sa bag-ong ‘seven wonders of the world. Ug lahi sa mga nangaging kompetisyon, garbo sa mga Pinoy nga may mga dapit sa nasud nga nalakip sa maong kompetisyon. Sa sitentay siete ka mga dapit nga karon gipilian sa website, nalakip ang Chocolate Hills sa Bohol ug Tubbataha reef sa Palawan. Usa ka dakong pasidungog alang sa mga taga rehiyon siete labi na sa mga taga Bohol nga mabutang sa mapa ang usa sa labing paboritong destinasyon sa turismo sa Pilipinas. Sa maong pasidungog mahatagan og mas lapad nga publisidad ang usa sa gipasigarbong lugar sa mga bisaya.
Karon, ana-a sa ika siyam ang Chocolate hills sa talaan nga nagsunod sa Tubbataha reef nga ana-a sa ikawalo. Pito ka mga dapit lang ang malakip sa bag-ong ‘seven wonders of the world’. Apan karon, awhag sa Dept. Of Tourism ug lokal nga gobyerno sa Palawan ug Bohol nga iboto ug suportahan ang Tubbataha ug Chocolate hills aron siguradong malakip sa pito ka mga dapit sa kalibutan. Matod sa DOT, di’ masukod nga publisidad ang hatud sa maong kompetisyon kun o galing malakip ang entry sa Pilipinas sa pito ka mga dapit.
Pinaagi sa pag-log-on sa www.new7wonders.com adunay kahigayonan nga makaboto sa paboritong lugar nga buot nimong modaog sa maong kompetisyon. Ug ang mga Pinoy nga naila sa pagkamahiligon sa internet, mas maayong maila sab sa pagkamahiligon sa pagboto sa mga lugar sa nasud nga nalakip sa prestihiyosong kompetisyon. Dakong hagit alang sa mga hingtungdang ahensya ug mismong sa pribadong sektor ang pagdani sa uban nga suportahan ang atong entry aron malakip sa labing bag-ong new seven wonders of the world. Mao na ni ang usa ka kahigayonan nga angayan nga pahimuslan tungod kay sa maong paagi, di’ lang ang Bohol o Palawan ang mabantog sa kalibutan apan ang atong nasud mismo.
Di’ lisud nga masu’d ang Chocolate hills ug Tubbataha sa pito ka mga manana-og kung molihok lang ang mga tunghaan, buhatan, ug bisan unsang organisasyon sa pag-awhag sa ilang mga sakop sa pagboto aron mosaka pa ang ranking sa atong mga entry. Naila ang atong nasud sa mga tawo nga mahiligon sa internet chatting ug surving. Usa ka dakong sagpa nga sa usa ka mabulokong kalihukan sama sa pagboto sa ‘new seven wonders of the world’, di’ magamit ang interes sa publiko alang sa usa ka maayong katuyuan. Kung nahimo sa uban ang pagsu’d sa friendster ug multiply dot com, way rason nga di’ sila mosu’d sa website aron iboto ang entry sa Pilipinas.
Sa pagkakaron, hingpit ang paningkamot sa Bohol ug Palawan nga mosaka ang ranking ug masu’d sa magic seven. Apan mas maayong tan-awon nga di’ lang ni kawsa sa mga dapit kung diin nahimutang ang entry sa nasud.
Apan usa unta ni ka kampanya sa tibuok nasud aron nga masigurong mabutang ang atong nasud sa pito ka mananaog. Kung tan-awon, pulos maayong butang ang hatud unya sa atong turismo ug ekonomiya kon o galing modaog ang Tubbataha ug Chocolate Hills. Ug karon ang kahigayonan aron suportahan ang usa ka kompetisyon nga may maayong hatud sa atong dungog isip usa ka nasud nga napuno sa daghang mga atraksyon ug may mga tawo nga mainitong mohangop sa mga bisita gikan sa nagkadaiyang bahin sa nasud. Napamatud-an na nga pinaagi sa turismo, di’ halayo ang paglambo sa usa ka nasud. Napamatud-an ni atong mga silingang nasud sa Asya sama sa Malaysia, Thailand, Vietnam ug Singapore. Ug karon nga may kahigayonan nga mas maila ang atong nasud, iresponsable na kaayo ta kung di’ pa nato gamiton ang usa ka talagsaong kahigoyanan.
Gisaulog sa Maayong Buntag Kapamilya ang iyang ika tulong anibersaryo karong buwana. Ug hangtud karon, daghan gihapon ang nangutana kung di’ ba lapoy ang momata og sayo aron lang paghatud sa labing preskong balita ug mahinungdanong features matag buntag. Apan sa usa ka pasundayag nga may pundasyon nga paghigugma sa serbisyo publiko, di’ na nimo mabati ang kakapoy ug kalaay. Buot nakong gamiton ning maong kahigayonan sa pagpasalamat sa among mga suking kasawo’ matag buntag. Dako sab ang akong pasalamat sa Banat News ug The Freeman sa makanunayong suporta sa pasundayag nga nahimo nang paboritong kauban sa mga taga Sugbo ug tibuok rehiyon siete matag alas says y media sa buntag.
