Nangutana lang ko

Nabukog na lang si Alona ug ang iyang mga ginikanan ug mga igsoon ilawom sa ilang lubnganan pero ang hustisya sa ilang kamatayon padayon pang gibugtaw. Ambot lang, maapsan ba kaha nila ang hustisya nga naa karon magdagan-dagan sa sala ni hukom Geraldine Faith Econg? Matagamtaman ba kaha nila ang hustisya? Sa katuigan nga nanglabay human sila gipatay aduna pa ba kaha silay mapaabot nga hustisya? Di ba kaha sila maabtan sa kalaay sa mga abogado nga mikuyog kanila sa pagbugtaw sa hustisya? Kutob lang gyod ta ani sa pagpangutana.

Sa kataas na sa panahon nganong hangtod karon wa pa man gihapon mahuman ang bista sa kaso ni Alona Bacolod Ecleo? Gituyo ba kini sa kahigayonan o gituyo lang kini sa mga abogado ni Ruben Ecleo aron malugwayan pa og taas nga panahon ang iyang paglulinghayaw? Ang kalangay sa kaso ni Alona mugna kaha kini sa kahigayonan o gituyo lamang kini sa mga prosecutors nga dili andam? Nganong wa man gihapon makahuman sa pagbista sa kaso ni Alona si hukom Geraldine Faith Econg hangtod karon, tungod ba kay dili siya pariha ni anhing hukom Martin Ocampo nga pursigidong mosunod sa iyang time frame paghuman sa kaso? O gituyo lamang niya kini aron mapasanginlan nga dili patas kay gusto nang molingkawas sa paghupot sa kaso nga daghang nagtan-aw ug daghang kamot nga influenciado nga gustong mobitad kaniya paingon sa pagsalikway sa hustisya nga alang unta sa mga biktima?

Si kinsa ba ang atong pakasad-on sa pagkalangay sa kaso ni Alona Bacolod Ecleo? Ang akusado nga si Ruben Ecleo? Ang mga prosecutors? O ang hukom nga si Econg? Nangutana lang ko!

Modangop ngadto sa labaw nga hukmanan ang Chamber of Real Estate and Builders Associations Inc. kun ugaling dili libkason sa Department of Agrarian Reform ang gipatuman niining moratorium sa pag usab sa mga yutang pang agrikultura ngadto na sa pangkomersiyo, pang industriya ug pangpinuy-anan. Ang presidente sa maong kahugpungan nga si Reghis Romero II miingon nga ang paglambo sa nasud gipugngan sa DAR human did-i niini ang land conversion. Porbida no? Kay ngano dili diay molambo ang atong nasud kun dili nato i-convert ang mga agricultural lands ngadto sa laing kagamitan? Sa ako nang giingon, dili dautan ang pagpalambo sa nasud apan kinahanglan nga sa atong pagpalambo niini dili usab nato isakripisyo ang mga butang nga naghatag kanato og kinabuhi.