Asa paingon ang video scandal?

Salig si House Speaker Prospero Nograles sa katakos sa Department of Health sa padayong imbestigasyong gihimo sa maong ahensya kalabot sa mga medical staff nga nalambigit sa kontrobersyal nga operasyon sa usa ka lalaki pagtang-tang sa canister sa iyang lawas. Matod ni Nograles, wa’ na kinahanglana pa ang pagsang-at sa maong isyu ngadto sa kongreso alang sa usa ka ‘house inquiry’ . Apan ang grupo sa pipila ka mga sectoral representative, desidong diskusyonan ang nahitabong iskandalo ug ipatawag ang mga tawo nga nalambigit sa operasyon ug sutaon kinsa ang nag-upload sa video sa ‘You-Yube’.

Tinuod, layo na og naabtan ang operasyon ni ‘Danilo’ human mabutang sa internet ug mapasa-pasa sa cellphone ang iyang operasyon kung diin nangatawa ug nagbugal-bugal kaniya ang mga medical staff nga nag-opera kaniya. Ang akong gikabalak-an, basin masagolan na sab og grabeng pamolitika ang pagtuki sa isyu ug mawa’ na sa hustong da’an ang tanan aron pagsolbad sa maong problema. Ang nakapait, samtang nagpadayon ang imbestigasyon, nagkadaghan pa ang panga’n sa mga tawo nga nalambigit sa isyu. Nipagawas og laing upat pa ka mga medical staff ang Department of Health nga mas taas pa og ranggo  itandi  naha-unang gipanganlan nga mga medical staff. Mas pang lapad nga pakisusi ang mahitabo karong mismong mga opisyal sa tambalanan apil usab diay sa maong kontrobersiya.

Laing anggulo na ‘sab ang mitumaw dihang mismong mga taga ospital nibutyag nga usa sa mga intern nga nikatawa ug nagbugal-bugal, anak sa usa ka dakong opisyal sa Vicente Sotto Memorial Medical Center. Kung tinuod ang maong pasangil, unsa ka matinud-anon og patas nga imbestigasyon nga mapaabot ni Danilo o sa publiko gikan sa mga taga ospital kung usa sa mga nalambigit sa isyu, anak sa opisyal sa tambalanan? Tungod ini, nawad-an na og pagsalig ang pipila ka sektor nga wa’y padulngan ang imbestigasyon sa ospital sa ilang mga tawo. Panghinaot lang sa katawhan nga di’ magpa-impluwensya ang DOH sa unsa may resulta sa imbestigasyon sa ospital.

Apan ang simbahan sa iyang bahin nipiyait sa matang sa pagtuki sa isyu. Sa di’ pa ipusdak ang tanang pasangil sa mga medical staff, angayang tan-awon nga may sayop ‘sab nga nahimo si Danilo. Sa maong punto, nigawas nga ang tinubdan ning tanan ang gitawag nga imoral nga lihok ni Danilo nga pakighilawas sa usa ka lalaki. Adunay punto ang simbahan ug nga kinahanglan nga magbasol ang biktima sa iyang gihimo. Apan di’ lang kutob dinhi ang pagtuki sa isyu. Tungod kay samtang gawasnon pa ang tawo nga nagbuhat sa pagpaslak sa body spray, nabutang sa dakong peligro ang posibleng sunod niyang biktimahon. Ingon og sa nakalimtan nalang sa otoridad nga ang basulon ning tanan gawas ni Danilo mao ang lalaki nga wa’y respetong nibuhat sa salaod.

Unsa mang matang sa silot ang nagpaabot sa mga nalambigit sa isyu kung mismong ang tambalanan ug DOH nibutyag nang daan nga lisud nga mawagtangan pa ta og mga doktor karong panahon nga nagnihit ang mga doktor diha sa mga tambalanan. Gani sa Vicente Sotto lang daan, gikan sa 400 bed capacity, niabot sa kapin 600 ka pasyente ang nasu’d sa tambalanan. Kung mahimo palang, gihangyo na sa taga tambalanan ang publiko nga di’ nalang mopasaka og reklamo sa Professional Regulation Commission ug sa Ombudsman aron di’matangtangan sa ilang lisensya ang mga tawo nga nalambigit sa kontrobersiya.

Gikan sa usa ka operasyon su’d sa OR, hangtud na sa pagbalandra sa maong kalihukan sa internet, layo na og naabtan ang maong kontrobersiya. Apan kung tan-awon ug palawman pa ang pagtuki sa maong iskandalo, simple lang ang tubag ining tanan. Nagnihit o nawad-an na ta og respeto sa atong kaugalingon o sa matag usa. Kung may respeto palang unta si Danilo sa iyang kaugalingon, di’ siya makiglambigit sa usa ka tawo nga wa’ pa niya hingpit makaila. Kung may respeto palang unta kang Danilo ang lalaki nga iyang nahimamat, di’ sab unta mabuhat ini ang pagpaslak sa canister sa lawas sa biktima. Kung may respeto palang unta sa pasyente ang mga medical staff nga mi-opera kang Danilo, di’ unta mosangko sa pagbugal-bugal ang usa ka seryosong operasyon. Kung may respeto palang unta sa pasyente ang mga taga tambalanan, gilimitahan unta ang pagkuha og video sa usa ka talagsaong operasyon. Ug kung may respeto palang unta sa proseso sa operasyon, wa’ unta  gi-upload ang maong video sa You-Tube ug gipasa-pasa sa cellphone. Kung may respeto palang unta.