Sipyat lang gyud!

Mao ni ang akong hunahuna sa nahitabong scandal sa V. Sotto Hospital. Alang nako, samtang atong nakita ang pagbugal-bugal, spur of the moment kadtong tanan, ug walay deliberate intent nga pakauwawan ang pasyente.

Sipyat lang gyud. Gumikan sa pagka-talagsaon, pagka-rare sa operasyon, nakalitan silang tanan, mi-enjoy sa nahitabo, apan, sa akong hunahuna, wala sa ilang intention ang pagpakauwaw sa pasyente.

Sipyat lang gyud … nakalitan silang tanan. Walay usa kanila ang nakahunahuna sa offshoot sa ilang gibuhat.

Apan, maayo sad tingali nga subayon kun kinsa ang nag-pa YouTube sa hitabo.

Kay sa dihang diha na kini sa internet, nahimo nang public scandal. Otherwise, kun diha lang kadto kutob sa operating room ug sulod sa mga camera sa naka-record niini, walay scandal nga mahitabo.

Di man to public performance, sama sa Wowowee, o sa Eat Bulaga nga mahimong i-publikar, o isulod sa internet. Busa, maayo sad tingali nga ilhon kinsa ang nagpa-YouTube niadtong hitaboa.

Sipyat lang gyud ang tanan. Ikaw ug ako, Dro, daghan kaayong mga sipyat ning kinabuhi. Ang uban, ikaw ra ug ang Ginoo ang nasayod, busa wala ma-public scandal. Samtang ang uban natong mga sipyat, na-scandalized ang publiko … ug igo na lang tang magpa-baga sa nawong.

Alang nako, that was an isolated case. Akong usbon, ang mga doctor wala magsabut nga ilang pakauwawan ang pasyente. Wala silay intention nga mao kadtoy ilang buhaton, otherwise, ila untang giimbitar ang mga cameramen sa ABS-CBN ug sa GMA7, aron masangyaw sa tibuok kalibutan ang maong hitabo.

Unsa man say ilang motive pagpakauwaw sa pasyente? Akong usbon, kun wa lang to ma-YouTube, dili unta kadto ma-scandalized, kay di man unta ko kakita adto. Di sad unta kakita si Pedro. Sila rang didto sulod sa operating room ang nakakita.

Akong usbon, daghan kaayo kitag mga sipyat sa atong kinabuhi, Dro. Ug sama sa ubang mga sipyat sa ubang mga tawo, nga mas grabe pa tingali kay sa kaugalingon natong sipyat, mahimong mapasaylo. Ato ganing gi-pardon si Erap, nganong di man ta makapasaylo sa mga doctor nga wala may kinabuhi nga nakalas, walay smuggling nga nahimo, walay cheating sa election, walay plunder, walay overpricing, ug walay fertilizer scam nga nahilambigit?

Gani, angayan pa tang magpasalamat nga malampuson ang operasyon. Nga naibot ra gyud ang gisulod sa samput sa pasyente. Yuna pa, kinsa bay nagsulod adto? Ug nganong misugot man siya nga ipaslak kadto sa iyang samput?