Angayang manubag ang ANZ International sa gihatag nilang labad sa ulo, kalangay ug kadaot sa 58 niini ka kliyente nga gidid-an pagkuha sa pasulit nga International English Language Training System (IELTS) niadtong Sabado.
Ensakto ang gibuhat sa 32 sa 58 ka mga kliyente nga mga doktor, nars, ug enhinyero nga mi-hold sa manager sa ANZ nga si Annabelle Diez ug iyang staff pinaagi sa panabang sa Criminal Intelligence and Detection Group (CIDG-7), aron makapanubag kini sa danyos nga nahimo sa kompaniya ngadto sa mga kliyente niini.
Ang maong 32 ka propesyonal midangop sa ANZ aron makakuha unta og pasulit sa pinulongang English isip usa sa mga rekisitos sa pag-abroad. Busa, aduna silay panahon nga gi-apas nga dili ma-apeke ang ilang paggawas sa nasud.
Apan mismo ang manager sa ANZ ug ang abogado nilang si Ronnie Vallena wala makasabot sa ilang gibuhat nga paghikaw sa ilang mga kliyente pagkuha sa pasulit.
Unya, nganong gikuwestiyon pa man ang pag-hold sa manager ug sa office staff sa ANZ didto sa buhatan sa CIDG-7?
Unsa man diay ang gustong mahitabo sa ANZ mamauli lang ang naalkanse ug nalangay nilang mga kliyente?
Ang abogado sa ANZ nga si Vallena nagkanayon nga sayop ang “citizens arrest” nga gihimo sa mga kliyente ngadto kang Diez ug sa staff sa kompaniya tungod kay matud pa niya: “When you say citizens arrest, she should have been caught in flagrante delicto or while actually committing or right after commission of the crime.”
Kanus-a man diay ipatuman ang citizens arrest, attorney, sumala sa imong gipamulong?
Katungod sa ANZ ang pagsunod sa plano sa abogado niini pagdangop sa Ombudsman aron kuwestiyonon ang pag-aresto sa manager ug staffer, apan maayong tan-awon una nila ang nahidangatan sa ilang mga kliyente una sila mo-assert sa ilang katungod.
Kasong damages mahimong mapasaka sa 58 ka kliyente batok sa ANZ kun tinuod nga wala sila makakuha sa pasulit nga dili nila sala.
* * *
NFA. Adunay nakatunol og dokumento sa atong buhatan pagmatuod nga aduna gyud diay binuang nga nanghitabo sa National Food Authority dinhi sa Sugbu.
Sa atong nasayran, 12 ka sako lamang ang gitugot nga mabaligya sa NFA ngadto sa mga grain retailers.
Apan nganong adunay invoice nga giisyu sa usa ka Brenda Cabahug niadtong Pebrero 25, 2002 tungod sa gipalit niining 5,000 ka sakong NFA rice sa balor nga P3.5 milyones?
Dili pa gyud na mao, ang maong invoice sa Pebrero 25, 2002 lamang. Adunay laing invoice nga nag-petsa og Pebrero 26, 2002, sa ato pa, pagkasunod adlaw nga giisyu sa samang tawo alang sa laing 5,000 ka sakong NFA rice sa mao gihapon nga balor.
Nahitabo kini niadtong 2002, apan nagduda ko nga nagpadayon gihapon kining binuang karon tungod kay wala gyud kini hibangali sa atong mga anti-graft investigators sa Ombudsman.
Busa, maayo tawgon nato ang atensiyon sa Ombudsman niining maong binuang.
Angayang kuoton sa Ombudsman ang alegasyon nga adunay gipaboran nga mga grain retailers si NFA assistant regional director Raul Chong.
Adunay sulat nga gipirmahan sa usa ka Jaime Ang pinetsahan og Nobiyembre 23, 2007 nga naabot sa atong buhatan. Mahitungod kini sa biyahe ni Chong didto sa Hong Kong uban ang usa ka Flordeliza Sumalinog, Marivic Gaw, ug Celiapo Cabuenas.
Maayong kumustahon nato si Ombudsman investigator Alejandro Borden unsa na ang naabtan sa iyang desisyon sa maong imbestigasyon.
Unsa kahay relasyon aning Brenda Cabahug nga anaa sa invoice ug kining Flordeliza Sumalinog nga kakuyog ni Chong didto sa Hong Kong, kun tinuod man ugaling nga nagkuyog sila.
Niadtong Septiyembre 8, 2007, mireklamo ang employees association sa NFA pinaagi ni Ang tungod sa nakita nilang pagpabor sa NFA Cebu sa pipila ka mga grain retailers sa pagbaligya kanila og bugas.
Karon, nagka-letse-letse na ang atong nasud ug apektado ang minilyon natong mga kabus nga kaigsuonan tungod sa rice crisis, baligyaan lang og tag duha ka kilo ang matag kunsomedor nga gustong mamalit sa usa ka accredited NFA rice retailer og NFA rice.
Samtang nanghitabo ang pag-limit og duha ngadto sa lima ka kilo matag kunsomedor nga maghago paglinya taliwala sa kainit sa adlaw, aduna diay pipila ka rice retailers nga hilabihang ka dako sa pabor nga gitagana sa NFA Cebu.
Adunay kataw-anan nga argumento ni Chong sa isyu sa The Freeman niadtong Septiyembre 8, 2007: “Dili sab na tinuod nga duna koy gipaboran nga retailers kay kaning pagpanghatag og daghang allocation tungod man ni sa pag-stabilize sa supply sa bugas sa merkado. Gani kun moadto ka sa mga merkado dili gyud mahutdan og NFA rice nga tag-P18 ang kilo.”
Pag-stabilize sa suplay sa bugas sa merkado? Ang pag-release og allocation nga 10,000 ka sakong NFA rice ngadto sa usa lamang ka rice retailer sa duha ka adlaw maka-stabilize sa suplay sa bugas sa merkado?
Didto sa kauluhan, naaktuhan sa raid sa mga awtoridad ang mga sako sa NFA rice nga nasakpang diha sa bodega sa mga Intsik nga commercial rice retailers.
Mao kini ang hinungdan nga nagtuo ang mga awtoridad nga ang mga NFA rice nga ilang gipamalit gikan sa NFA ipangsagol sa commercial rice nga imapaligya sa kamerkaduhan. Sa ato pa, adunay mga bugas diha sa kamerkadohan nga mapalit og kapin sa P30 ang kilo nga sinambogan na diay og NFA rice.
Tan-awa unsa katikasan kining NFA.
* * *
CITOM. Niadtong Sabado sa sayong buntag, samtang nagpaingon ko sa UC-Banilad agi sa Imus road aron motambong og law review, gipara ko sa usa ka traffic enforcer paglabang nako sa eskina Mango Ave. ug Imus.
Ambot og nabatasan na ba sa mga traffic enforcer ang pagpangayo dayon sa lisensiya nga dili gani maka-esplikar unsay sala sa motorista, gipangayo dayon niya ang akong lisensiya.
Wala ko mohatag sa akong lisensiya, nanaog ko og nagpakuyog sa enforcer sa lugar diin ko makalapas sa lagda sa trapiko.
Didto nako nasabti akong kalapasan nga mao ang “crossing solid line” tungod kay nasulod na ko sa solid line nga puti unya mikawat pa gyud ko sa tuo aron makaderetso paingon sa dalan sa Hipodromo. Pun-an pa nga wala ko mag-seatbelt.
Apan na-shock ko sa dihang giingnan ko sa enforcer nga upat kuno akong violation. Mao nga nagpa-esplikar ko niya.
Bisan wala ko makasabot unsa to ang upat nako ka violation, nagpasalamat ko sa enforcer nga si Ruben Ong kay naghago gyud siya og esplikar nako sa upat nako ka violation taliwala sa kainit sa adlaw.
Saludo ko ni Ong tungod kay panagsa ra ko makakita og ingon niining klase nga public servant nga magtuman sa trabaho unya maghago pa gyud og esplikar bisan dili na niya trabaho ang pag-edukar sa motoristang ihalas pa sa lagda sa trapiko.