Kotse sa akong anak, na-tow sa dalan RR Landon, atbang sa PDEA, kilid sa Normal University. Mi-park siya kay dunay gihatod nga papeles sa Normal University, sa ato pa, dali ra kaayo, mga 10 minutos da.
Misuway siyag eksplikar ug hangyo nga kahatagan og consideration, kay gawas nga dali ra kaayo ang pag-park, diha may laing mga sakyanan nga nag-park, in fact, nagpatunga siya sa laing mga sakyanan nga nag-park.
Wa gyud pahangyo. Misuway kog sangpit sa pipila natong mga higala sa city hall, to no avail kay matud nila, private gani ang mo-tow, wa silay mahimo.
Bayad mig P1,800 ngadto sa towing firm, P100 only to the government for the violation. Nindot nga negosyo. Pagkuha pa sa akong anak sa sakyanan didto sa junkyard sa towing firm, iyang nakita nga hugaw kaayo ang dapit, nagkayamokat lang. Luoy kono kaayo ang mga sakyanan nga tingali gi-impound, ilabina ang mga bag-o nga naputos sa abog.
Na-flat ang ligid, ug sa dihang mi-reklamo ang akong anak, giingnan lang siya nga “kiha lang, didto sa legal department isumbong.” Pastilan, kahambugero baya gyud nato.
Question. Nganong pilion man nila ang pag-tow? Kada adlaw man kong muagi sa RR Landon, imong makita nga daghan kaayo ang mag-park tibuok adlaw kilid sa Normal University, nganong wa may towing? Bisag clamping na lang, o citation? Ngano man ni, Dro?
Ug nganong mahal man kaayo? Kinsa may nagbuot sa P1,800? Ug nganong mi-contract man ang dakbayan sa private towing firm? Unsa may gibasihan sa P1,800? Di ba ka-afford ang number one city of the Philippines paghupot og kaugalingong towing truck?
Kun makapalit tag brand new nga mga sakyanan alang sa atong mga halangdong Konsehal ug ubang mga dagkung opisyal sa dakbayan, nganong di man ta maka-afford og usa ka towing truck? O nganong di man ta ka-afford pagpa-ayo sa daan ug gubaon nga towing truck sa dakbayan, aron di ta kinahanglan mo-hire sa private firm?
Bidang sakita hunahunaon sa P1,900 for nothing. Akong usbon, mi-park ang akong anak taliwa sa laing mga sakyanan nga nag-park. Nganong siya ra man ang gi-initan? Ug kada adlaw, whole day ang parking sa mga sakyanan kilid sa Normal University RR Landon side, nganong gitugotan man ni? Kada agi nako sa maong dapit, mosakit ang akong dughan kay nabawo mig panghuwam sa P1,900, ug imong makita nga whole day nga nag-park ang mga sakyanan sa maong dapit. Di mosakit imong dughan ani, Dro? Bag-o lang kong nagpa-x-ray, ug nakita nga mi-enlarge ang akong kasingkasing. Tungod ba kaha kay kada-adlaw kong muagi sa RR Landon?