Atong hangdon ang mga bata

Di’ na kapugngan ang pagsikat sa batang si Charise Pempengco. Human sa iyang malampusong pagkanta sa mga numero unong ‘talk show’ sa Amerika ug Uropa, nibirit na sab ang trese anyos nga bata sa labing tinahod ug gisunod nga pasundayag sa kalibutan ang ‘Oprah”. Sa maka-usa pa gipakita sa bata nga di’ gyud kabintahaan ang talento sa mga Asyano partikular sa mga Pinoy. Ug sa usa ka talagsaong higayon, nibarug ug gipakpakan ang banggiitang si Charise nga padayong naghatag ug dungog sa nasud. Ug kung ang sama na ni Oprah Winfrey ang modayag ug suporta sa usa ka bata sama ni Charise, maka-ingon ta nga wa’ nay makapugong sa padayong pagsikat sa batang Pinay diva.

Ning bag-o, nahimong labing batang kampyon sa duwa nga chess ang laing Pinoy. Si Wesley Saw, ang labing bata nga chess grandmaster sa tibuok kalibutan sa edad nga katorse. Bisan kung hamtong nang iyang mga gikasangka, gipakita sa chikiting nga walay makapiri sa iyang abilidad sa duwa nga alang sa mga tawo nga taas og salabutan ug ‘analytical power’. Matag karon ug unya adunay mga batang Pinoy nga molugwa sa media bitbit ang ilang garbo alang sa nasud nga napuno sa daghang problema ug kontrobersiya. Ug samtang nagkataas ang atong respeto sa talento sa maong mga bata, ingon og nagka-ubos usab ang atong pagtan-aw sa mga hamtong nga mga tawo nga pirting nakahatag og dakong uwaw sa atong pagka-Pilipino.

Usa na ini ang makapahugno nga disposisyon sa mga doktor , nurses ug uban pang mga medical practitioners su’d sa operating room sa Vicente Sotto Medical Center. Makapa-alarma paminawon nga ang usa ka pribado untang operasyon, naputos sa kantyaw, katawa ug pagpaka-uwaw sa usa ka pasyente nga nagpatang-tang sa usa ka butang su’d sa iyang lawas. Ingon ini na ba ka ubos ang kalidad sa propesyonalismo sa atong mga doktor ug nurses? Asa naman ang gitawag nga edukasyon nga nakab-ot sa mga medical practitioners kung sa usa ka talagsaong kaso sa operasyon, mabuhos lang sa wa’ ang tanan. Sa usa ka nasud nga giila nga usa sa nag-unang exporter og mga nurses ug uban pang medical professionals, makapahugno paminawon nga may mga tawo nga labaw pa sa bata ang disposisyon samtang gihimo ang ilang trabaho.

Panahon na aron aninawon ug tan-awon unsang matang sa dungog ang gihatag sa kabataan samtang nagka-ubos ang kalidad sa propesyonalismo sa nasud. Di’ lang ang mga doktor ug nurses ang nabutang sa dakong pangutana ang kalidad ug sinsiridad apan mismong mga lokal ug nasudnong opisyal nga samtang nagkadugay sa ilang mga pwesto, nagkalapad pa ang mga pasangil sa kurapsyon o pagpangawkaw sa kaban sa gobyerno. Ug samtang padayong naghupot sa posisyon, mi-grabe pa ang ilang pagpangabuso sa pwesto ug mas nagkadako pa ang ulo sa ilang kabanay nga daw sa naka-tungtong sa kabaw.

Pila naba ka isyu sa korapsyon ang nabutang lang sa limot ug gilupad lang sa hangin ug hangtud karon, wa’ gihapoy nasilotan nga mga tawo? Nagpabiling dakong tanghaga nganong kublan ug di’ madutlan sa balaod ang mga dagkong opisyal sa nasud apan ang mga kabus nga nakahimo og simpleng kasaypanan, pirti kapaspas nga nataral sa hukmanan ug gisilotan sa ilang nahimo. Sa usa ka nasud nga padayong nagkalapad ang gintang sa mga kabus ug adunahan, makapa-alarma paminawon nga mas pang nagka-ubos ang kalidad sa kinabuhi sa mga Pinoy. Ug samtang nagkadugay, nagka-ubos pa ang propesyonalismo sa mga Pinoy sama sa nahitabo sa usa ka tambalanan. Kung kini ang magpadayon nga sitwasyon, nabutang nga wa’ nay kapanaminan ang mga bata apan ang ila ra sang isig ka bata.

Ang mga sama ni Pempengco ug Saw ang nakahatag og igong dungog sa usa ka nasud nga nabasa na sa daghang isyu sa kahiwian. Gikan sa kontrobersiya sa eleksyon hangtud na sa binilyon ka pesos nga isyu sa korapsyon, nabutang sa labing ubos nga bahin sa kalidad sa moralidad ang mga hamtong nga Pinoy nga mao untay sundon sa kabataan. Swerte nalang nga may mga ginikanan nga naka-aghat sa mga bata sa pagsunod sa tarong nga da’n bisan pa kung padayong nagpabuyag ang mga opisyal sa gobyerno nga mao untay tamdanan sa bag-ong henerasyon. Bisan sa nagkataas nga kaso sa mga kabataan nga nagpabuyag sa komunidad, aduna pay daghang mga bata nga wa’ pa matakdi sa kabati ug kahugaw sa kalihukan sa palibot.