Political will

Kun ipakita lang g’yod lagi ang “political will,” ang mga masinupakon sa balaud wala g’yoy mahimo.

Sama dinhi sa dakbayan, bisan og ang siyudad aduna nay anti-dispatching ug anti-car watching ordinance, apan wala kini hingpit nga gipatuman sa atong mga tinugyanan sa balaud.

Resulta, nagpabiling midagsang diha sa lainlaing dapit ning dakbayan kining mga tawo nga mga “extortionist.” Ayaw og hatagi dili ba ang mga drayber og PUJ mahasol kanunay.

Sigurado ko nga kun dili masumbagan niining maong mga dispatchers, kanunay lang masuyakan ang ila nga sakyanan.

Nalipay ko kay nakita nako kagahapon sa rekord didto sa korte nga pito ka dispatchers ang gipasakaan og kaso tungod sa paglapas sa City ordinance 2108.

Sila mao si Loren Belarmino, Felipe Gallarde, Noe Alvia, Arnold Zapanta, Alexis Ejara, Juvie Mangubat ug Joseph Edgar Ajer, mga nagpuyo sa lainlaing dapit dinhi sa dakbayan.

* * *

Daygon usab nako si Major Vicente Mercado, ang hepe sa City Hall demolition team kay iya na g’yod nga gipaguba ang mga tindahan sa mga vendors kilid sa Fort San Pedro kagahapon.

Bravo mga sakop sa Squatters Prevention Encroachment Elimination Division. Ang tinuod, nalipay ko nga nahawan na ang maong lugar aron mahibalik ang kaanindot sa maong plaza.

Dili na tingali angay’ng balikon pa nako ang pagpasabot kun nganong gisuportahan nako ang pagpaguba sa maong mga tindahan nga kapin na sa napulo ka tuig nga gitukod diha sa kilid sa plaza.

Aw tan-awa lang god nga wala na ang maong mga tindahan diha, dili ba monindot na ang maong lugar. Unya, kinahanglang idili g’yod ang pag-parking sa mga sakyanan diha.

Kun mo-parking, aw kinahanglang mobayad sila. Angay nga ilakip kining maong lugar isip “parking pay area” kun moinsister g’yod sila.

Apan alang nako, angay nga hawan kanunay ang maong lugar aron dili maghuot ang mga sakyanan paingon sa pantalan.

* * *

Duna g’yoy mga beneficiaries sa provincial ordinance 93-1 nga nagduha-duha na pagpasaka og kaso batok sa gobernador.

Ang tinguha niadtong uban nga mopasaka og kaso sa Ombudsman gitumong aron kuno mapugos ang gobernador, si Gwen Garcia ug ang ubang opisyal sa Kapitolyo, nga ihatag na kanila ang titulo sa yuta nga nahingpit na nila pagbayad.

Apan tungod sa pamahayag ni higalang Capitol spokesman Rory John Sepulveda nga ang pagpasaka og kaso makapalangay lang hinoon sa pag-release sa titulo, mitingkag ang dunggan sa mga beneficiaries.

Lagmit pa g’yod kuno nga maapektahan ang ubang mga beneficiaries nga wala pa makahuman sa pagbayad sa yuta nga ila nga gipuy-an.

Gipasabot ko ni Atty. Sepulveda nga ubos sa kasabotan, kadtong wala makatiwas pagbayad sulod sa termino nga gilatid sa ordinansa, mahimo na nga bawian sa yuta.

Apan kun dili masuko ang mga opisyal sa Kapitolyo kanila, mahimong piyongan lang sa gobernador ang kalapasan sa mga beneficiaries.

* * *

Makaloluoy kaayo ang kahimtang sa katawhan karong panahona nga nagmahal na pag-ayo ang presyo sa nag-unang palaliton – ilabi na ang bugas.

Sayonan ka nga ang Ganador tag P37 na man. Kun ang paliton nimo ang sinako nga tag-napulo ka kilo ang sulod, P373 ang sako kay gipabayran man usab og P3 ang sako.

Kadtong dili intawon makaabot pagpalit og mahalong matang sa bugas, magmantinil na lang og NFA rice ug matagbaw na intawon paglinya diha sa mga accredited NFA rice retailers.