Tabanog sa kamatayon

Sa pagsu’d sa ting-init, nakapangawot na usab sa ilang ulo ang mga piloto gikan sa domestic ug international flights. Di’ tungod sa kainit sa panahon apan sa pagdagsa sa mga tabanog diha sa kawanangan nga naka-ali sa ilang rota sa pagtugpa ug pagbiya sa tugpahanan. Dugay nang gireklamo ang maong mga tabanog hangtud nga nakasinati gyud ug dakong trahedya sa miaging tuig kung diin usa ka helicopter ang na-crash ug unom ka kinabuhi ang nakalas sa trahedya. Human sa kuti nga imbestigasyon nigawas nga ang hinungdan sa insidente mao ang pagkalambod sa hikot sa tabanog sa palabad sa helicopter paingon sa makina ini.

Human sa makalilisang nga trahedya sa miaging tuig, gisaad sa mga hingtungdang ahensya nga di’ na masubli pa ang maong problema. Tungod ini, nipalabang ang lokal nga kagamhanan sa Lapu-lapu ug ordinansa pagdili sa tabanog, baloons ug mga toy planes sa kawanangan. Adunay multa nga nagpaabot niadtong mga tawo nga masakpan nga nakalapas sa maong lagda. Apan mag-unsa man ang ordinansa kung walay gahum sa pagpatuman ini? Kung napatuman pa ang maong lagda nganong hangtud karon nag-probleman man ang mga piloto sa kadaghan sa tabanog nga nibabag sa ilang agi-anan ug naghulga sa kaluwas sa abyon ug sa mga pasaherong nagsakay ini.

Matod sa taga Air Traffic Services, mokabat sa trese ka reklamo gikan sa mga piloto ang ilang nadawat sa buwan lang sa Marso. Ug karong wa’ pa gihapon hingpit nga mapatuman ang balaod, gikabalak-ang mas daghan pang reklamo ang madawat sa maong buhatan. Simple lang ang hangyo sa mga piloto: ang pagdili pagpalupad ug tabanog su’d sa 5 nautical miles aron pagsiguro sa kaluwas sa mga abyon. Ang nakapait, ingon ug magpabiling problema ang maong reklamo tungod kay wala pay nakitang lakang ang taga tugpahanan nga gipatuman ang mga lagda batok sa mga tabanog diha sa tugpahanan.

Kung tan-awon ang mga nahitabong disgrasya, nahitabo ning tanan tungod sa huyang nga pagpakabana sa katawhan. Kung kanus-a mahitabo ang trahedya, mao pay pagkisi-kisi sa mga hingtungdang ahensya aron di’ na masubli pa ang maong insidente. Apan tungod kay gikalimtan nalang ang unom ka kinabuhing nakalas sa barangay Humay-humay sa dakbayan sa Lapu-lapu, nitumaw na usab ang reklamo sa mga piloto karong ting-init. Kay kung may pagpakabana pa ang mga opisyal pagsumpo sa problema, di’ na sila kinahanglan nga magpaabot pa og reklamo gikan sa mga piloto. Apan tungod kay nisugmat ang sakit nga ‘ningas kogon’ sa mga Pinoy, karon ang mga piloto ang nabutang sa dakong alaot ug kabalaka.

Alang sa usa ka bata nga walay laing gitan-aw gawas sa kalipay nga iyang nabati sa pagpalupad ug tabanog, maglisud siya pagsabot unsa ang epekto sa iyang gikalingawan nga duwa sa mga piloto ug uba pang mga establishemento. Apan kung ipasabot lang pag-maayo sa mga bata ang epekto sa tabanog, di’ halayong sila na mismo ang mo-undang sa ilang kalingawan o mopili ug mga dapit nga luwas gikan sa disgrasya sa pagpalupad sa ilang tabanog. Apan sa nahitabo karon, gawas nga nagbungol-bungol lang ang mga hingtungdang otoridad sa maong problema, wa’ pa mapasabot ang kabataan unsa ang epekto sa ilang pag-tabanog.

Apan di’ lang ang mga piloto ang nagreklamo sa tabanog. Dugay nang gipadangat sa mga kompaniya sa kuryente ang pagpalupad ug tabanog duol sa mga linya sa kuryente. Ang pagkasangit sa hikot sa tabanog sa linya sa kuryente maoy nakaingon sa pagkapawong sa suplay sa kuryente. Ug tungod sa maong insidente, di’ maihap ang kadaot ug perwisyo nga hatud ini sa publiko. Makapahugno paminawon nga matag tuig ta nga makasinati  og kainit sa panahon ug nga pagsu’d sa maong panahon mao usab ang pag-uso sa tabanog. Apan bisan pa ini, ingon ug walay konkretong solusyon ang mga otoridad pagsiguro nga di’ na masubli pa ang mga insidente tungod lang sa tabanog. Kung hatagan lang og tukmang dapit nga luag ang mga kabataan ug walay nakababag nga linya sa kuryente nga layo usab sa tugpahanan, siguradong siento porsiyentong kalipay ang hatud sa pagpalupad og tabanog.