Wake up call

Gikabalak-an sa mga experto nga moabot pa ngadto sa tag 102 pesos ang matag kilo sa bugas sa musonod nga mga buwan. Kini gumikan usab sa padayong pagsaka sa prisyo sa mga produktong petrolyo nga sa pagkakaron hapit na moabot sa tag 150 dolyares ang matag barel niini sa kalibutanong merkado.

Ang padayong pagsaka sa prisyo sa bugas nagpahinumdom lamang sa atong kagamhanan unsa ka mahinungdanon ang pagkaon ug ubang abot sa umahan sa matag usa kanato nga adunay kinabuhi dinhi sa kalibutan.

Ang padayong pagsaka sa prisyo sa bugas namukaw lamang sa atong kagamhanan nga nagpabaya ug mibaliwala sa pagkamahinungdanon sa pagkaon kay maoy giseguro niini ang mga butang nga dili makaon. Kinsa bay magtoo nga magnihit ang pagkaon sa usa ka agrikultural nga nasud?

Gumikan sa pagbaliwala sa kagamhanan sa sektor sa atong agrikultura nahimo kitang kataw-anan sa silingan natong kanasuran sa Southeast Asia. Nahimo kitang kataw-anan sa mga taga Thailand ug mga taga Vietnam kinsa kitay nagtudlo sa rice production. Pagkabaliktad nga paminawon ug tan-awon nga ang mga nasud nga atong gitudloan sa pagpananom og humay mao nay numero unong mamaligyaay og kitang nagtudlo mao nay numero unong mamalitay.

Gumikan sa pagpalabi sa mga butang nga dili makaon, ang atong mga basakan ug maisan ug ubang umahan nangawagtang ug gihulipan kini og mga subdivisions, golf courses ug uban pa.

Ang way hunong nga land conversion sa mga agricultural lands ngadto na sa pagka commercial, industrial ug residential lands dako og natampo sa pagnihit sa bugas ug sa padayong pagsulbong sa prisyo niini.

Kun si Polpot kaniadto sa Cambodia mimando sa tanan niyang katawhan apil na ang mga professionals sa pag adto sa bukid alang sa pagpananom kay ambition niyang mamahimong numero unong agrikultural nga nasud sa kalibutan ang Cambodia, ang atong nasud lahi, gusto sa atong mga lider nga ilhon kitang kabahin sa mga industrialized na nga kanasuran, resulta, nagnihit na ang mga pagkaon ug labing seguro mosamot na gyod unya pagdaghan ang mga walay kaon.

Ang pag ambition nga mamahimo kitang usa ka industrialize nga nasud dili dautan apan gikinahanglan usab nga dili nato ibutang sa   kompromiso ang pagkaon nga labing gikinahanglan sa katawhan.

Ang pagpahibalo ni pangulong Gloria Macapagal Arroyo nga migahin na ang iyang administration og 5 bilyones ka pesos alang sa mga mag-uuma nagpakita nga nakaamgo na ang kagamhanan sa kamahinungdanon sa pagkaon. Manghinaot lang ta nga kining maong kantidad mapunta gyod ni ngadto sa mga mag-uuma. Dili unta ni mapunta ngadto sa mga bag-angang buaya!