Palpak sa NFA
Nasuko si Presidente Gloria Macapagal Arroyo sa gihimong pagpangronda sa National Bureau of Investigation ug sa National Food Authority sa warehouse nga giabangan sa negosyante nga si Reagan King didto sa dakbayan sa Mandaue diin dul-an sa 30 mil ka sako sa bugas humay ang nasakmit.
Ang pagpangronda gihimo sa NBI basi sa search warrant nga giisyu sa korte tungod sa paglapas sa P.D. 4 o ang balaud nga nag-umol sa National Food Authority kay matud pa way licensiya ang maong bodega. Ang regional director sa NFA mismo nga si Danilo Bonabon maoy miisyu og certification pagmatuod nga dili lisensiyado ang bodega nga gisudlan sa maong bugas.
Apan taliwa sa pagbuhat sa ilang trabaho ang NBI maoy nasentro sa kasuko sa presidente. Nituo si Presidente Arroyo sa pagpalaban sa negosyante nga si King nga wa man lang gani susihang daan kun unsay gibasihan sa NBI sa pagpangronda. Kun duna may angayang kasab-an ug taktakon gyud sa katungdanan mao ang mga opisyal sa NFA tungod kay silay tinubdan sa palpak. Kun wa pa moisyu og certification si Bonabon nga di lisenyado ang maong bodega di mahitabo ang pagpangronda. Lusot ni Bonabon mao nga ang pangalan nga gihatag sa NBI niya mao ang Mariano Martinez hinungdan nga niingon siya nga way lisensiya sanglit didto marehistro sa Jolli Trading ang maong bodega. Apan wa itug-an ni Bonabon nga didto sa request sa NBI giklaro ang address hasta pa ang numero sa bodega.
Grabe na man pod og wa gyud ninyo susiha ang inyong listahan? Maayo siguro nga magsabot sila si Bonabon ug ang iyang provincial manager nga si Ramon Astilla tungod kay samtang miingon si Bonabon nga way lisensiya si Astilla moluwat sab og laing certification nga nagkanayon nga lisensiyado ang bodega. Hain man gyuy tinuod? Busa kun akoy King ang NFA maoy akong pabayron sa kahasol nga akong nahiaguman tungod sa ka tanga sa mga opisyal niini.
* * *
Ang labihan ka kuti nga sestima diha sa Philippine International Trading Corporation pag-import og bugas maoy
Dili ba mas maayo nga ilargo nato ni og hatag sa dunay puhonan aron makadaginot ug malikayan ang taas kaayo nga presyo? Nganong motaas ang presyo? Kini tungod kay ang PITC mohatag sa allocation sa mga farmer cooperatives. Ang kooperatiba mobaligya sa ilang allocation ngadto sa mga negosyante nga dunay puhonan nga mao nay mohimo sa importation.
Ang negosyante mobalik napod didto sa PITC aron maoy moimport para nila diin kinahanglan sila nga mobayad og service fee. Natural nga ang negosyante mopatong sa ilang gasto ngadto sa kooperatiba ug sa PITC sa presyo sa bugas. Nganong di man lang ilargo sa atong gobiyerno ang paghatag og allocation sa mga negosyante nga maka afford aron di sila kinahanglan nga mobayad didto sa kooperatiba? Sa ingon niini mapadali ang proseso ug mas minus ang gasto.
Wa kaha tuyoa nga kuti ang proseso aron mas may kahigayonan ang mga kurakot nga mga opisyal sa pagmaniobra aron sa pagpangwarta? O aron duna silay magamit sa ilang illegal nga kalihukan pagpayuhot og bugas?
* * *
- Latest
- Trending
