Ang eskandalo sa baboy

Hangtod kanus-a kaha mahuman ug maputol kining mga eskandalo sa administrasyong Arroyo? Unya na kaha kun mawagtang na kini siya diha sa Malakanyang?

Ning bag-o laing eskandalo na usab ang nabulgar sa Commission on Audit diin 1.5 bilyones ka pesos ang nawagtang gikan sa pundo sa Quedan Corporation nga alang unta gamiton sa pagpamalit og mga baktin ug tambal para sa Swine Program sa kagamhanan.

Sigon sa resulta sa audit nga gihimo sa Commission on Audit, kaniadtong tuig 2004 ang Quedan Corporation nangutang kini sa banko og mokantidad sa lima ka bilyon ka pesos alang sa Swine Program niini. Sa maong kantidad, giingon nga 2.25 bilyones niini ang gipamalit og mga baktin, tambal ug mga vitamina, apan nasuta sa COA nga 176 milyones ka pesos lamang niini ang napunta sa maong katuyoan. Ang findings sa Commission on Audit nagpakita nga adunay 1.5 bilyones ka pesos sa pundo sa Swine program ang nawagtang ug wa na igkita. Apil na pod sa wa igkita sa pagkakaron mao ang ilang Presidente nga si Noel Buenaflor.

Asa kaha karon ang Presidente sa Quedancor? Mitago kaha siya o wa pa lang magpakita kay gitun-an pa unsaon pagpanubag sa mga pangutana kun nganong nawagtang ang 1.5 bilyones ka pesos nga pundo sa Swine program. Mopakita pa kaha ang presidente sa Quedancor o padayon na ang iyang pagkahanaw? Kun di siya magpakita, miapas na kaha siya ni Jocelyn “Jocjoc” Bolante nga mitago didto sa Amerika tungod sa fertilizer scam nga iya upod nga gikalambigitan?

Ang Quedan Corporation, usa kini ka Government-owned or controlled Corporation nga mogarantiya niadtong gustong mangutang sa banko para gamiton og negosyo.

Naunsa na ba kining atong nasud, hasta pa ang baktin ug mga baboy, tambal ug mga vitamina niini gikaw-kaw pa?