Daghan kita'g nakat-onan nga leksiyon sa pagkasunog sa simbahan sa Oslob. Una, di maayong mo-kompiyansa. Kinsa go'y magtuo nga tibuok simbahan masunog! Unya, kining faulty electrical wiring pirme g'yung maoy makaingon sa daghang mga sunog. Gani, kun ang mga fire investigator maglisud nag-determine unsay hinungdan sa sunog, moingon dayon nga faulty electrical wiring – ug motuo dayon ta.
Mao nga kinahanglan siguroon gyud nato ang mga kutay sa kuryente sa atong mga pinuy-anan, sa mga buhatan (ilabina sa Comelec), sa mga pabrika, ug bisan sa mga simbahan.
Kon kuryente ang hisgutan, di maayong mag-mantinir sa mga materyal kay nangitag barato. Ug kinahanglan mokonsulta gyud sa mga electrician ug niadtong suhito sa electrical wiring.
Ug bahin sa imahen sa Mahal nga Birhen nga waa malakip ka-sunog, nahinumdom ko pagka-ugdaw sa among balay sa Lapulapu City, diin, ang nahibilin nga wa masunog mao ra ang rebolto ni Sr. San Roque ug ang casing nga glass. Ug bisag usa ka gihay sa iyang buhok wa gyud maunsa.
Niining duha ka hitabo, kun dili milagro kay di man ka, Dro, motuo'g milagro, unsa man?
Ug balik sa sunog, usa ka dakung negligence on the part of the fire department ngano nga ilang gipasagdan ang gubaon nilang mga fire truck? Pila na man ka tuig nga guba ang maong mga firetruck? Ila bang gipadangat ngadto sa ilang labaw ang maong kahimtang – apan wa sila tagda kay way kwarta?
Ug labaw sa tanan, nganong nagtuo man sila nga way mahitabo nga sunog sa Oslob, hinungdan nga wa lang sila maningkamot pag-ayo sa ilang mga fireturck? Ang uban kahang mga lungsod no?
Anyway, ang maong hitabo, usa ka drawback sa atong mga paningkamot pag-promote sa turismo sa atong lalawigan, ug pag-attract og mga investors ngadto sa kalungsuran. Ug dili maayong paminawon nga atong padad-on og kaugalingong mga firetruck kadtong buot mo-invest sa kalungsuran. Di ba, Dro?
Ug bahin sa turismo, akong experience nga sa atong pag-travel, kun kaihion ka, mabawo tag pahipi sa kasagingan. Ug kun walay kasagingan, unsa man?