Pagkanindot sa lakang ni Konsehal Edgardo Labella nga pugson g’yod ang mga tagdumala og kan-anan dinhi sa dakbayan nga mohatag sila og libre nga tubig para mainom sa ila nga mga customers.
Aron paghimo niini, buot ni Konsehal Labella nga himoan og kausaban ang Sanitary Code sa dakbayan sa Sugbu. Sigurado g’yod hinuon ko nga suportahan kining maong lakang ni Labella sa kaubanan niyang mga konsehal.
Nakabantay bitaw ko nga diha sa mga dagkong kan-anan, dili ka na hatagan og libreng tubig kun mokaon. Ang ubang kan-anan dunay tubig apan pabayran og tag P2 ang baso.
Daygon nako si Konsehal Labella tungod niining iyang lakang aron pagproteher sa katungod niadtong mga sama intawon nako nga dili na unta ganahan nga moinom og softdrinks.
Unsaon nga kun “bottled water” usab ang imong imnon, mahal pa man sa softdrinks ang presyo. Makadugang kini og kadaku sa bayranan sa usa ka kabus nga customers.
Ang husto mao nga bisan og dili mangayo og tubig ang customers, hatagan lang gihapon.
* * *
Mora’g misamot na g’yod katungason nga magkauli pa ang maayong kabubut-on nila ni Mayor Tomas Osmeña ug Gobernador Gwendolyn Garcia kay ang gobernador mipasaka na og kaso batok sa mayor.
Naguol ko niining maong kalamboan kay tinguha man god unta nako nga dili magkaaway ang mga opisyal, ilabi na sila si Gwen ug Tommy nga mga chief executive officers sa dakbayan ug probinsya.
Bisan si Tommy sigurado ko nga motangdo siya nga daghang kaayohan ang mamugna kun maayo ang relasyon tali sa mga local chief executives. Dihang si Tommy maayo pa og relasyon sa Kapitolyo, ilabi na ni Pablo John Garcia sa wala pa kini mahimong kongresista, daghan siya og mga nahangyo.
Usa niini mao ang paglibkas sa usa ka kondisyon sa pagdonar og yuta kilid sa Waterfront Hotel aron nga iilis sa pribadong yuta nga natukoran og usa ka tunghaan sa usa sa mga barangay dinhi sa dakbayan.
Kay suod pa man sila si Tommy ug Gwen niadtong higayona, walay problema ug natuman ang pagtangtang sa usa ka kondisyon diha sa Deed of Donation aron nga magamit na ang maong yuta sa bisan unsang paagi.
Ang kapitolyo usab, dali ra nga makahangyo sa dakbayan kun duna silay mga maayong plano sa ila nga yuta nga ania mahimutang sa syudad. Karon, lisud kaayo ang paglihok sa duha ka LGU.
Tungod sa ila nga panagsungi, hayan nga dili na g’yod hinoon maka-develop ang Kapitolyo sa ila nga kayutaan dinhi sa dakbayan kun mahinayon nga madeklarar na kini nga “residential sites.”
Samtang ang dakbayan magkapuliki usab og panagang sa mga kaso nga ipasaka sa gobernador, sama sa pagbawi sa kayutaan, apil na ang Fuente Osmeña, nahimutangan sa Cebu City zoo ug uban pa.
Basta, alang nako dili g’yod maayo nga magkasumpaki ang mga lider dinhi sa dakbayan ug probinsya sa Sugbu.
* * *
Uy, congrats diay sa mga bag-ong abogado. Pagsuwat nako niining maong lindog kagahapon, wala pa makapublikar ang Supreme Court sa talaan sa mga bar passers.
Dili usab ma-open ang website sa Supreme Court kay kapin sa milyon ka computers ang naka-link hinungdan nga “busy” kaayo. Maayo unta og ang akong kumpare nga si Johnrey Saavedra nakapasar.