Turismo sa kalungsuran

Tingali ang Sugbo, ug mismo ang Pilipinas, gihimo sa Ginoo aron mahimong destinasyon sa turismo. Kay kun dili pa, nganong gihatagan man kita niining mga nindot kaayong kadagatan, kabukiran, kalanggaman ug kabaybayonan? Nganong gihatagan man kita niining hiyas nga mahigalaon, maabi-abihon ug mapahiyomon?

Gamay ug limitado ang atong kadagatan. Dili sama sa ubang lugar ug kanasuran nga halapad ang ilang mga yuta aron tamnan alang sa dinagkong agrikultura nga sarang makabuhi sa atong katawhan. Ug tungod kay dili patag ang atong yuta, dili kaayo angay tukuran sa mga pabrika sa mga dagkong industriya.

Mga delegado gikan sa tibuok Pilipinas ang gatapok karon dinhi sa Marriot Hotel sa Dakbayan sa Sugbo alang sa seminar sa CBRT kon Community Based Rural Tourism. Ang mga mamumulong gilangkoban dili lamang sa mga eksperto dinhi sa Pilipinas kondili gikan usab sa ubang nasud. Kining maong kalihokan gipangunahan sa Department of Tourism ug gipaluyohan sa Probinsya sa Sugbo.

Ang CBRT dili mao ang turismo sa mga karaoke bars, diskohan, kidlap kidlap nga sugang dagitabnon. Dili kini ang turismo nga makaguba sa kinaiyahan ug moralidad sa kabatan-onan. Kini ang matang sa turismo diin ang tradisyonal natong mga hiyas isip Pilipino ug natural natong mga talan-awon ang gipasigarbo ug i-showcase.

Ang proyekto sa Lalawigan sa Sugbo nga mao ang Suroy-Suroy sa Sugbo mao ang nag-unang ehemplo sa CBRT. Hapit tanang lugar dinhi sa atoa adunay kaugalingong festival, adunay kaugalingong musika ug kaugalingong produkto. Niadtong pipila  ka semana ang milabay, ang Suroy-Suroy milibot sa Southern Cebu, ug karong umaabot nga mga adlaw, moliyok na sad kini sa Northern Cebu.

Pinaagi sa CBRT, ang taga rural nga mga lugar makabaton og garbo sa ilang gigikanan. Ang CBRT usab maghatag kanilag alternatibo nga panginabuhi sa walay pagdaot sa kinaiyahan. Pinaagi sa CBRT, ang mga anak sa atong mga anak adunay puruhan nga makatilaw pa ug maka-eksperyensya sa atong maanindot nga kultura, kasaysayan, ingon man ang atong mga kadagatan, kabaybayonan, ug kabukiran.

Alang sa inyong mga panahom, palihug email sa [email protected]. Daghang salamat.