May ugma pa

Unod sa wali sa usa ka pari ang labing mahinungdanon nga mensahe sa pagtamod ug pag-hinumdum sa pagkabanhaw ni Hesu Kristo mao ang paglaom. Matod sa pari nga angayan nga tan-awon ang Domingo sa pagkabanhaw nga panahon kung diin mahatagan og igong kusog ug paglaom ang katawhan nga sa matag pagsuway, adunay nagpaabot nga bag-ong paglaom. Paglaom nga dili sayon nga makit-an labi na sa kasamtangang sitwasyon sa nasud karon. Sa mga tawo nga nawala sa maayong da’n, sa mga kinabuhing nagkahanap ang matarong nga da’n ug sa mga ni bisan kinsa nga nawad-an na og kusog nga mobarug luyo sa mga pagsuway, paglaom ang hatud sa kahitas-an.

Daghan ang nakapangutana nganong nahilom ang mga isyung gibato sa kasamtangang administrasyon atol sa mga adlaw nga atong gihandum ang pagpasakit ni Kristo sa krus hangtud na sa iyang kamatayon ug pagkabanhaw. Matod sa uban, kung nahimo sa isig ka habig sa maong isyu ang mohilom ug mohatag og panahon sa pagtan-aw sa unsay mga panghitabo sa ilang tagsa-tagsa ka kinabuhi, di’ ba pwedeng hingpit nalang ipadaplin ang maong isyu. Apan di’ lang angayan nga ilubong sa limot ang usa ka kontrobersiya kung diin naglaom ang katawhan ang mahatagan og hustisya, tubag ug linaw ang daghang mga pangutana nga nagduwa sa huna-hunan sa katawhan.

Tinuod, may ugma pa. Kini ang kanunay nga ipahinumdum kanato labi na kung magkisi-kisi na ta sa pagpangayo og tubag o katumanan sa daghang mga butang nga buot natong hatagan  og igong tubag o katumanan. Daghan ang nag-ingon nga matag adlaw kinahanglan nga isipon nga katapusang adlaw sa imong kinabuhi aron nga makalikay ka sa paghimo ug mga di’ maayong butang sa imong kinabuhi. Apan alang sa mga tawo nga nahugno na sa mga pagsuway sa salapi, gugma ug mga problema sa panlawas, gikinahanglan nga mahatagan og igong kusog aron makapadayon sa kinabuhi bisan sa bug-at nga gibitbit nga bagahe sa pagbiyahe.

May ugma pa. Kini ang usa ka mensahe nga naghatag nato og paglaom nga mobarug sa kinabuhi nga puno sa pagsuway labi na sa mga butang nga wala sa atong mga kamot ang gahum sa pagsolbad. Matag adlaw, minilyon ka mga Pilipino ang nawad-an og paglaom tungod sa kalisud nga nasinati karon, tungod sa isyu sa politika ug tungod sa kurapsyon nga ingon ug imposible nang masolbad pa. Bisan pa sa paningkamot sa ordinaryong Pinoy nga makabangon sa kalisud kung mismong ang gobiyerno nga iyang gi-respeto ug gi-serbisyohan ingon ug hanap na ang gipadulngan, walay laing mahimo ang mga tawo gawas sa pagdawat sa mga butang nga wala siya’y igong gahum sa pag-usab sa padulngan ining tanan.

Atol sa semana santa, daghan ang nahatagan og igong panahon nga hinuklogan ang mga panghitabo sa kinabuhi. Tukma ang maong mga adlaw sa paghatag og panahon nga masuta unsay padulngan sa kinabuhi luyo sa mga pagsuway ug kasaypanan nga nahimo. Apan di’ sa tanang higayon nga aduna kay igong kapasidad sa pag-usab sa dagan sa imong kinabuhi kung mismong ang gobiyerno ingon wa’ pa matarug ug maleksyon sa mga panghitabo sa kagahapon. Ug samtang nagkadugay ang pagtuki sa mga isyung gisangitan sa gobiyerno, nagkapupos usab ang paglaom nga gihambin sa katawhan. Di’ nalang ta mahibu’ng nganong matag adlaw mokabat sa kapin tres mil ka mga pinoy ang mobiya sa nasud aron manimpad sa ubang dapit. Bisan pa sa gipasigarbong minilyong trabaho sa gobiyerno kung mismong sa nasud nga iyang gigikanan, walay undang ang kisaw sa politika, mas gipili pa sa uban ang mopuyo sa usa ka dapit nga mas klaro ang padulngan ug mas tataw ang ugmang nagpaabot inay sa iya mismong nasud nga matag karon ug unya, gitay-og sa isyung politikal ang gobiyerno nga dako kaayo ang epekto sa dagan sa ekonomiya o kinabuhi sa mga Pinoy.

Paglaom ang hatud nga mensahe sa pagkabanhaw ni Hesu Kristo. Apan di’ lang diha kutob ang mensaheng hatud niya tungod kay kung palawman pa, iyang gipahinumdum kanato nga dagkong buhi ang iyang Diyos nga atong gituhuan. Ug samtang nag-iyahay ta og himo sa mga butang ning kalibutana, adunay laing kinabuhi sa pikas kalibutan nga maoy angayan nga pangandaman ug naghatag og bag-ong paglaom.