Dili mo-refund

Dunay usa ka tawo nga napuwerhisyo sa iyang paglukat og ticket sa barko nga magbiyahean sa rota nga Cebu-Ubay (vice versa). Ang barko mogikan sa Cebu matag alas 9 sa gabii paingon sa Ubay, Bohol.

Human ang tawo nakalukat og ticket, nahinumdom siya nga aduna siya’y dad-onon nga butang nga iyang nahikalimtan. Nahibilin ang maong importanteng butang sa iyang gipuy-an sa Sugbu. Ug kay apiki na man sa oras, seguradong mabiyaan na gayod siya sa barko kun iya pang kuhaon ang maong butang. Maong nakahukom siya nga dili na lang mohinayon og sakay sa barko ug magpa-refund na lang siya sa iyang gibayad sa ticket. Pero nagka-problema siya kay dili man mo-refund ang tig-issue sa ticket diha sa Pier 1. Nakapangalot sa ulo ang tawo.

Iya ning gikonsulta sa taga barko. Miingon ang taga barko nga mahimo gyud niyang ipa-refund ang iyang ticket. Pero dili gyud mo-refund ang tig-issue sa ticket. Unya na kuno ang refund kun mahalin na ang tanang ticket. Binuang! Dili ba duna may abiso sa ubos sa ticket nga “Refund of ticket before departure is subject to 10% with valid ID”? Nga sa ato pa, mahimo ang refund. Kuhaan hinuon og 10% pero okey lang basta mahimo. Pero nganong dili man modawat og refund ang tig-issue? Unsay gusto niyang palutawon sa iyang pagmagahi? Just asking!

* * *

Sa laing bahin: “Good day, Sir. Ngano man nang Globe nga magsige man og padala og text message unya mahurot na lang dayon ang atong load? Bisan kausa ra ko ni-text pero ni-check operator service na ang akong cellphone. Sus, maayo pag dili na lang nato gamiton ang atong cellphone, uy.” -- 0916-9121040 (Sent:01:01:15am--September 19, 2007)

Daghan na gyud bitaw kaayo ang nagreklamo mahitungod niini apan hangtod karon wala pa man gyud intawon kita pamatia sa mga network provider. Inconvenience man god kini ngadto sa mga subscriber. Unta ila nang kapangitaan og solusyon kining misteryosong pagkahanaw sa load nga wala magamit.

* * *

(Sumbong ug reklamo? Text sa 0910-8105522)