EDITORYAL - Human na ang kahigayonan

Si Cebu Archbishop Ricardo Cardinal Vidal miawhag kang kanhi Presidente Joseph Estrada sa pagtuman sa iyang saad nga dili na mag-apil-apil sa pamolitika ilabi na sa pagdagan isip pilionon sa usa ka puwesto sa gobiyerno.

Usa man gud sa mga saad ni Estrada sa dihang giproseso pa ang iyang pardon ni Presidente Gloria Arroyo mao nga dili na siya mamolitika labi na nga magpapili pa sa mga eleksyon nga ipahigayon.

Apan karon si Erap gikutlo sa mga mantalaan nga mipadayag sa iyang interes sa pagpapili. Ug gani, suma pa sa media, nagsugod naman kini sa paglibut-libot sa Metro Manila nga mora bag nangampanya.

Hinaut unta nga maminaw si Erap kang Kardinal Vidal kinsa iyang giilang spiritual adviser niya.

Human na ang kahigayonan nga gihatag ngadto kaniya. Panahon na nga magretiro ug maghatag og kahigayonan ngadto sa uban.