Palaspas

Ngayon ay Linggo -– Linggo ng Palaspas

ang araw na ito’y may gintong sagisag:

dumating si Jesus -– Dakilang Mesiyas

Siya’y sinalubong ng dasal at galak!

Bayang Jerusalem nang Kanyang sapitin

mga tao roo’y naging madasalin;

bata at matanda’y iisa ang hiling

makita si Jesus sa Kanyang pagdating!

Sa bungad ng bayan Siya’y sinalubong

ng maraming taong nasasabik doon;

dahon ng oliba at iba pang dahon

iwinawasiwas ng nagsisalubong!

Ngayon naman tayong mga mamamayan

ang nangyari noon ay iginagalang;

bilang pagdakila sa Diyos na banal

palaspas na dala’y pasok sa simbahan!

Ito’y tradisyon nang ngayo’y ginaganap

sa mga simbaha’y dala ang palaspas;

matanda at bata’y iisa ang hangad –-

basbasan ng pari mga dahong hawak!

Sa daigdig ngayon lahat ng Kristyano

di nalilimutan ang gawaing ito;

nasa sa isipan at taglay sa puso –-

hawak na palaspas ialay sa Santo!

Dahil nga sa ito’y isa nang tradisyon

sa maraming bansa’y ginagawa ngayon;

ang masama lamang –- sa bayan at nayon

nasabing palaspas ay napapatapon!

Sa ngayo’y hindi na pinag-iingatan

nasabing palaspas sa mga tahanan;

matapos na ito ay mabenditahan

mga lantang daho’y nasa basurahan!

Bakit nga bakit nga tayong mga tao

bisa ng palaspas naglaho sa puso;

hindi ba’t n’ong araw ito’y nasa pinto

panlaban sa sakit at saka sa diablo?