Bakak vs. Bakak

Naglisud tag pangita sa kamatuoran tungod kay kun atong tuhoan ang matag-side, either ang both sides nagsulti sa tinuod o namakak. Ug tungod kay di man mahitabo nga magkatakdo ang ilang mga pamahayag, sa ato pa, di mahitabo nga nagsulti sa tinuod ang both sides, apan, mahimo nga mamakak ang duruha ka side – maoy hinungdan nga hangtud karon, wa gyud makatuyhakaw ang kamatuoran.

Unya, ang mga ahensiya sa gobiyerno nga gitahasan unta pagpangita sa kamatuoran, daw nawad-an man sa credibility, ang katawhan maoy nahimutang sa alanganin.

Alang sa kadaghanan kanato, mao karoy nagpatigbabaw ang mga alegasyon batok alegasyon, akusasyon batok akusasyon, bakak batok bakak.

Ang nahitabo, mao nga ang uban kanato, nakahukom na, mi-claim nga ila nang nakita ang kamatuoran, ug mipakanaug na sa ilang hukom. Ang hukom: “Gloria Resign!

Apan sa pikas nga bahin, ang ilang hukom mao nga ibilin si Gloria sa gahum ug maghuwat na lang sa 2010.

Sa ato pa, nasiak ang nasud. Ug dili maayo.

Ang angay buhaton mao nga kun dunay mga akusasyon, sama sa gihimo ni Jun Lozada, kinahanglan nga kini tubagon ug pruybahon nga bakak ang akusasyon. DILI IGO NGA I-DENY LANG. Kay sa mga denial nga himoon, sundan gyud nig pamakak.Mao kini ang nahitabo karon sa atong nasud. Denial, denial denial.

Ug kun sa pag-deny himoon ang pagpamakak, ang mahitabo mao ang paghimakak sa bakak nga gihimo. Sa ato pa, kun namakak si Lozada, kinahanglan alkontrahan kini sa kamatuoran, dili sa laing bakak. Apan, tungod kay ang gituhoang bakak, kontrahan man sad og laing bakak, di gyud kaugpo ang kamatuoran.

Maoy hinungdan nga nagpabiling tanghaga ang Garci tape, ang Bolante case, ug daghan pang mga alegasyon, tungod kay igo lang tang mi-deny sa mga akusasyon, ug wala kita makamatuod beyond reasonable doubt nga bakak ang tanang akusasyon.

Gumikan niini, ang katawhan mihimo na lag kaugalingong   mga desisyon tungod kay ang mga institusyon, nga gitahasan pagpangita ug pagbutyag sa kamatuoran, napakyas man (in the public’s perception), pagtuman sa ilang mga tahas.

In the meantime, mag-unsa man ta, Dro?