Pila na ka tuig ang nakalabay gitugaw ang dakbayan sa Sugbo human tulisa ug patya ang usa ka tinun-an tungod kay wa ihatag niini ngadto sa tulisan ang iyang celphone. Kun wa pa motugyan sa iyang kaugalingon ang giingong tulisan nga si Brian Sasan ngadto sa mga police sa dakbayan sa Talisay human sa taas nga higayon nga pagtago-tago di pa gyod unta siya madakpan ug di pa gyod unta makasugod sa pagtuyok ang ligid sa hustisya sa biktima nga si Carmela Cabañog.
Kaniadtong miaging semana lain na usab nga tinun-an ang gitulis ug gipatay. Celphone gihapon ang gikuha sa yano lang kaayong mipalayo nga tulisan. Ang nakapait kay samtang nangayo og pakitabang ang biktima nga si Ruby Jade Ruba human pusila sa tulisan gikataw-an lamang kini sa kauban sa mga tulisan. Si Ruby mograduwar na unta sa iyang kurso nga nursing karong petsa 30 ning buwana. Ambot kun madakpan ba sa atong mga police ang way puangod nga mga tulisan.
Ang kaso nila ni Carmela Cabañog ug Ruby Jade Ruba pipila lamang sa mga kaso sa pagpanulis og mga celphone nga nahitabo dinhi sa Sugbo. Napunting lamang sa katawhan ang kaso nila ni Carmela ug Ruby gumikan sa pagkasalbahis sa mga tulisan nga mibiktima kanila. Sa ilang kaso dili lamang ang ilang celphone maoy gikuha sa tulisan nga mitulis kanila kun dili giapil usab sa pagkuha gikan kanila ang ilang mga kinabuhi.
Ang mga kabanay, kahigalaan ug katawhang nagpakabana nanawagan og hustisya sa gidangatan sa mga biktima apan mahatagan kaha sila og hustisya? Dili kaha masusama sa uban ang ilang kaso nga nahikalimtan na lamang? Kanus-a ba magmadaugon ang atong balaod batok niining mga kaliwat ni satanas nga naghamok sa atong katilingban?
Misiaw ang mga pagpanulis og celphone karon kana gumikan kay aduna man ugod mga tawo o mga tindahan nga mamalit og mga tinulis o kinawat nga mga celphone. Ubos sa Anti-fencing nga balaod dakupon ug mapasakaan og kaso kadtong mga tawo ug mga tindahan nga mamalit og mga kinawat nga mga butang. Gani sigon sa maong balaod dili puwede nga maka-operate ang mga tindahan nga nagnegosyo og buy and sell kun wa kini permiso gikan sa atong kapulisan.
Gahom usab sa atong mga police ubos sa maong balaod ang pagbisita sa maong mga tindahan aron matan-aw niini kun misubay ba kini sa balaod. Pero nasayod kaha niini ang atong mga police? Daghan na man ugod ta og nahibaw-an nga mga tindahan dinhi sa dakbayan sa Sugbo nga maoy bagsakanan sa mga tinulis ug mga kinawat nga mga celphone ug uban pang mga butang pero mura man og wa pa tay nabalitaan nga tindahan nga gironda sa atong mga police kay namalit ug namaligya og mga kinawat nga mga butang? Manghinaot lang ko nga ang atong kapulisan ug mga opisyal sa dakbayan sa Sugbo magtambayayong ug mopahugot sa pagpatuman niining anti-fencing law aron maminosminosan kun dili man mawagtang ang mga kaso sa kawat ug pagpanulis dinhi sa dakbayan.