Pasiunang kadaogan

Sa di pa ka mahugno sa mga pasidaan nga ang mga protesta pagpangita sa kamatuoran sa NBN-ZTE scandal mahisama sa nangaging mga paningkamot pagsusi sa ubang gipasangil nga mga kahiwian sa kagamhanan, nga wa magpus hangtod nga natabonan sa mas bag-ong mga kontrobersiya ug nakalimtan sa katawhan, niang mga kadaogan nga nasakmit na sa katawhan:

• Gikanselar ni Pres. Arroyo ang NBN-ZTE deal dihang nakabuylo nang imbestigasyon sa Senado ug gisang-at nang kontrobersiya ngadto sa Korte Suprema;

• Nikalit lag kaabtik ang Ombudsman ug ang DOJ pag-imbestigar sa kontrobersiya human giyak-an ang mga kaso batok nilang First Gentleman Mike Arroyo ug kanhi Comelec chairman Benjamin Abalos nga gipasaka lima na ka buwan ang nilabay;

• Gipapas nang Executive Order 464 tungod sa demanda sa CBCP ug ubang nagpakabanang hut-ong sa katilingban ug human gibasura sa labawng hukmanan ang duha ka labing mahinungdanong probisyon ini.

* * *

Kasagaran ning maong mga kausaban gipatuman sa pamunoang Arroyo wa pay buwan human sa unang pagpakita ni Rodolfo Noel Lozada Jr. sa Senado. Klarong natay-og ang Malakanyang sa paspas nga paglapad sa mga protesta human nitabi si Lozada. Maong si Pres. Arroyo, bisan sa iyang pangugat nga pipila lang ang nagpaluyo sa mga protesta, nagkapuliki pagsablig og bugnawng tubig sa nagbaga nga mga pakisayod sa mga hut-ong nga niadto nitugot lang sa mga maniobra pagtabon sa gikuwestiyon nga mga transaksiyon.

Salamat sa pagpakita sa braso sa militar ug kapolisan, sa mga bakak nga gisangyaw sa mga turutot sa Malakanyang ug, karong bag-o, sa mga pasidaan sa terorismo, ang gipangandoy nga gidaghanon sa mga tawo nga magtapok sa kadalanan wa pa makab-ot. Apan gikuyawan si Arroyo kay gawas sa naandang mga walhon ug politikanhong oposisyon niapil na pagpaningil sa kamatuoran ang iyang kanhi mga alyado, apil nang iyang kaugalingong tulonghaan.

* * *

Maong bisan supak sa kabubut-on napugos si Pres. Arroyo pagpasiugda og kausaban. Nakahukom na bang magmatinud-anon? O sama sa naandan nag-ulug-ulog lang? Bisan unsa pay katuyoan, maahat si Arroyo pagpatuman og uban pang kausaban kon di molugak ang pagpakabana sa katawhan.

Di mapatuman sa usa lang ka pamilok ang gipangayo nga kausaban sa sistema. Ang ubang kausaban magkinahanglan gani og kausaban sa batakang balaod. Apan ang nagkadaghan nga mga kanhi sakop sa gabinete nisugyot sa mosunod nga kausaban nga mapatuman ni Arroyo karon dayon:

• Pagsuspenso ni Transportation Secretary Leandro Mendoza kansang buhatan maoy nagpasiugda sa NBN;

• Pagsuspenso nilang Environment Secretary Lito Atienza ug PNP Chief Avelino Razon tungod sa gipasangil nga pagdagit ni Lozada sa NAIA; ug

• Paghunong sa pagpanghasi batok ni Lozada ug sa iyang pamilya ug pagkiha na sa mga opisyal nga iyang gilambigit sa kahiwian.

Email:[email protected]