Yabag

Usahay, bisan kun nindot ang usa ka kanta, dili kini maayong paminawon kun yabag ang gakanta. Sama usab sa usa ka mensahe nga maayo unta ang unod niini, apan kun dili maayong pagkasulti sa naghatod sa mensahe, dili madasig ang mga naminaw niini.

Sibaw ug saba kaayo ang mga nagprotesta batok sa pamunoan karon. Dunay mga akusasyon sa pangurakot, moral revolution, communal action, ug uban ang termino nga maanindot litokon ug paminawon. Apan taliwala sa maong saba-saba, kulang gihapon ang kadasig sa kinabag-an nga moapil niini. Dili tungod kay wala sila motuo sa mensahe. Maayo ang mensahe. Tinuod nga daghag milagro kining paagi sa atong gobiyerno usahay. Sama sa kontrobersyal nga lamppost niadtong ASEAN Summit, sa Mega Pacific deal sa COMELEC nga gi-anular sa Korte Suprema, Jose Pidal, ug uban pa.

Apan yabag ang mga nagkanta. Wala silay angay. Medyo sintunado. Adunay usa ka artista nga konbiktado sa pagpangawkaw nga maoy manawagan og moral revolution? Wala pa gani niya mauli ang iyang kaugalingong kinawkaw! Adunay nangulo sa protesta nga moingon nga ang mga pobre gipahimuslan? Dili ba nag hunger strike ang ilang mga trabahante sa asyenda kay dili gyud sila mobahin og gamay nga yuta alang sa ilang mga saop nga sulod sa pipila ka dekada maoy nagpadato kanila? Mga saop nga tinuod nga Pilipino ang dugo, samtang ang nanag-iya sa asyenda mga kaliwat og insik! Nalimot ta sa Kamag-anak Incorporated nga gilangkoban sa iyang mga igsoon ug paryente nga otro sang giakusahan sa pagpangawkaw? Kataw-anan kay nag-uban silang duha karon. Pipila ka tuig nga ninglabay, si Insik maoy nag-una una pagpalagpot sa artista!

Unya nia say politiko nga, sa pulong pa sa akong amigo, pwerteng maayoha modalag estorya, tipo kining mahalinan ug refrigerator bisag adto mamaligya sa North Pole! Gusto sa iyang anak nga mag-apil apil sa bahin sa kwarta’s gobiyerno nga gamiton sa proyekto bisan kun ginadili kini tungod kay ang iyang amahan anaa sad sa pwesto ug dili usab kwalipikado ang iyang kompaniya. Unya kay dili man sad mamahin ang uban, maong nangaway. Sa ato pa, ang hinungdan sa away dili kaayohan sa katawhan kundili away sa binahinay. Matud pas panultihon, ang usa kuno ka kawatan masuko sa laing kawatan.

Ug mao nga gusto nila nga molambigit kadtong mga tawo nga adunay kredibilidad. Sama sa atong pinanggang kardinal. Kay kun mosulti pabor kanila ang naulahi, himoon man unta ni nilang puhonan sa ilang mga kaugalingong katuyoan. Apan morag dili sold out ang kardinal kay mibalibad man kini.

Daghan ang mipaluyo sa panawagan sa Dilaab Foundation nga mopirma sa hangyo sa pagpagawas sa kamatuoran bahin niining misteryosong mga transaksyon sa gobiyerno. Gisuportahan kini sa katawhan tungod kay adunay kredibilidad ang mga nagpaluyo niini, ug ang tumong mao ang government accountability sa katawhan ug dili destabilisasyon, dili aron pagbungkag sa atong nasud.

Tungod sa kredibilidad ug balido nga katuyoan sa mga Obispo sa pagsusi sa kamatuoran, ang presidente natandog ug mibawi sa Executive Order 464.

Ikomparar kini sa panawagan sa mga politikong gustong magkayabag kining atong nasud. Nanawagan sila karong bag-o sa mga OFW kun trabahante sa gawas sa nasud nga dili magpadala og kuwarta sa ilang mga minahal diri sa Pilipinas kay aron maguba ang ekonomiya sa Pilipinas. Kantang yabag! Buot nilang magniwang kita sa kagutom aron makabalos sila sa ilang politikanhon ug hakog nga mga ambisyon.

Kining lakang sa Dilaab Foundation usa ka responsableng lakang. Usa ka kantang maanindot ang mensahe, ug maanindot ang tingog sa nagkanta. Mao kini ang klase nga nindot paminawon, nga mosuhot sa kasingkasing niadtong hingtungdan.

Alang sa inyong mga panahom, palihug email sa [email protected]. Daghang salamat.