Mahuman o dili?

Nigawas ang pagkasugarol sa mga Pinoy karon taliwa’ sa mga pasangil sa korapsyon batok sa administrasyong Arroyo. Sukad nga gilusad ang sunod-sunod nga lihok protesta nga nanawagan sa pagkanaog ni Presidente Arroyo sa pwesto, daghan nang mga lantugi nga nitumaw sab sa diha sa mga panimay, tindahan ug tambayan sa mga barangay kung monaog ba gyud ang presidente sa pwesto sa di’ pa ang 2010. Karon, nitukar ang pagkasugarol sa uban tungod kay gihimong tinubdan sa pusta-anay ang sitwasyon  sa administrasyon. Adunay uban kung nahibaw-an nga nilibo ang kantidad nga gipagawas sa ilang mga bulsa aron lang mosalmot sa mga pusta-anay kung mokana-og ba ang presidente gikan sa iyang katungdanan.

Imo bang gisundan ang mga panghitabo sa miaging semana labi na niadtong adlaw’ng Biyernes atol sa inter-faith rally? Imong makita ang libuan ka mga tawo nga nisalmot sa protesta aron sa pagpangayo sa kamatuoran ug panawagan kang Presidente Arroyo nga mobuhi na sa iyang pwesto. Dinhi sa Sugbu, kapin libo ka mga raliyista gikan sa mga militante nga pundok ug mga taga nagpadaiyang simbahan ang nisalmot sa protesta. Ilang gipangdani ang mga motorista nga mobusina sa ilang mga sakyanan alang sa kamatuoran. Ug wala sipyata sa mga sagad sa mga motorista ang mga raliyista tungod kay sagad sa mga motorista, nisalmot sa pagsaba-saba.

Ang maong matang sa lakang ug uban pang kalihukan mao say nahitabo kaniadto dihang gipanawagan ang pagkanaog ni kanhi presidente Erap gikan sa pwesto. Hinungdan nga dili pwedeng ipagamay sa mga taga administrasyon ang ingon ining matang sa welga tungod kay mao ni nakapalukapa sa duha na  ka gobyerno—kang Marcos ug Estrada. Kung nagtuo ang presidente nga tibuok gihapon ang suporta sa mga sundawo ug kapulisan, dali ra kining mausab kung ang mga tawo na mismo ang mohangyo sa ilang hukbong kusog nga mo-atras na sa ilang suporta tungod ug alang sa kabag-ohan ug pagkab-ot sa kamatuoran. Kung magdumili gihapon ang administrasyon sa pagtabang aron pagkab-ot sa kamatuoran, mas mahatagan pa gyud og dugang rason ang katawhan nga magduda ug maglagot sa administrasyon.

Ang usa ka tawo nga gibudhi-an sa iyang lider dili mahimutang hangtud nga iyang matugkad ang kamatuoran ug mahibaw-an kung gi-unsa siya sa pag-ilad sa usa ka pamunuan nga iyang gisaligan nga mohatud kaniya sa tinud-anay nga kalambuan nga wa’y isyu sa korapsyon o pagpangawkaw. Hangtud nga di’ matubag ang nagkadaghang pangutana ug di’ malimpyo ang mga pagduda sa huna-huna sa katawhan gipanlantaw nga mas lanog pang panawagan sa kamatuoran ug pagnaog sa presidente sa pwesto ang atong madunggan diha sa kadalanan. Ang nakapait kay ingon ug naanad nalang ang administrasyon sa paghimo sa mga kontrobersyal nga lakang luyo sa mga pagduda sa unsay mga hokus pokus nga nahitabo.

Kung magdumili sa pagbuhi sa pwesto si Presidente Arroyo padayon ning mag-antos sa mga pagsaway, wa’y pagsalig ug wa’y hingpit nga kooperasyon gikan sa katawhan tungod kay namantsahan na ang maayong relasyon tali sa gobyerno ug sa iyang mga tawo. Kung tinud-on sa presidente ang iyang gibuhian nga pahayag nga siya ang pangu’ sa nasud hangtud na sa 2010, mahulog lang sa mga pagduda ug pagsaway ang mosunod nga kapin duha ka tuig pa sa termino sa presidente Arroyo. Nabutang sa wa’y kasigurohan ang nahibiling panahon sa presidente sa katungdanan ug ang matag lakang nga iyang himuon aduna nay mga pagduda sa publiko.

Apan sa gipakitang batasan sa presidente atol sa isyu sa ‘hello garci’ mahulog nga aduna gyuy igong katakos ang presidente sa pagpabilin sa pwesto hangtud nga mahuman ang iyang termino. Kung sa mga miaging tuig nabutang sa dakong kwestyon ang mismong integridad sa iyang pagka-presidente, karon naputos sa isyu sa korapsyon ang iyang pamunuan. Apan kung ang mga political analysts ang tuhuan, si Arroyo lang ang presidente sa nasud nga may igong kaisog o kabaga sa nawong sa pag-atubang sa mga kontrobersiya nga iyang gi-atubang. Kung monaog ba ang presidente sa di’ pa ang 2010, kana maoy angayan natong ipusta sa panahon.