Ang dalan sa krus

Sanglit Kwaresma man karon mao nga ang DALAN SA KRUS pagahimoon. Adunay usa ka hubog nga naghimo sa maong balansayon ang gibuyag sa mga tawo sanglit nagsugod man siya sa katapusang estasyon paingon sa unang estasyon. Ang hubog igo lang sa pagtuwaw: “Bantog ra nga si Jesus nagkabaskog!”

Pamalandong

Ang dalan sa Krus maoy timailhan sa kang Kristong panaw padulong sa altar sa usa ka dugoong paghalad sa kaugalingon alang kanatong mga makasasala. Daghan kanato ang dili buot sa krus kini tungod kay hadlok kita sa iyang epekto diha sa atong kinabuhi. Daghan nato ang dili buot nga mamahimong moambit sa mga palas-onon ug sakripisyo. Apan mao kini timan-i higala nga dili kita matawag nga Kristohanon kun wala ang Krus ni Kristo Jesus.