“Good day Sir. Kana bang mosakay sa mga bus nga mga tawo nga manghatag og sobre nga para kuno sa kanta sa kabataan, tinuod ba nga didto idapat o gamiton ang ilang makolekta gikan sa mga pasahero? Curious lang ko.” -- 0921-8253713 (Sent:11:01:38pm-- February 6, 2008)
Adunay tinuod niana pero dili maayong mokompiyansa. Aduna man sab goy uban nga misakay lang sa panahon. Mas maayo gyud nga sa dili pa kamo mohatag og hinabang sa ingon niini nga matang, sutaon una kun unsa nga organisasyon ang nagpasiugda niini. Labing maayo nga i-verify ninyo sa ilang buhatan kun tinuod ba nga may gisugo silang mga tawo sa pagpangolektag donasyon pinaagi sa pagpanghatag og mga sobre.
Hinuon, sa sitwasyon nga nagsakay ka sa bus, malagmit wala ka nay panahon pagkontak sa opisina sa organisasyon nga maoy nagpasiugda sa pagpangolekta og donasyon alang sa kabataan. Anaa ra gyud ninyo kun mohatag ba kamo o dili. Karon laging panahona, daghan na kaayong binuang busa dili ta angay magdali-dali sa atong desisyon.
* * *
Naghisgot na man gyud ta bahin sa sobre, ato na lang sab pahinaykan paghisgot ang laing estilo sa modus operandi nga gigamit gihapon ang maong butang. Alang sa kasayoran sa tanan, adunay mga badlongon sa katilingban nga ang gigamit sa ilang modus mao ang sobre nga may tatak sa ngalan sa usa ka simbahan o parokya.
May nakahunghong nako nga usa sa sagad gamiton sa mga mangingilad mao ang sobre nga may tatak nga “world mission”. Ang estilo niining maong mga tawo mao ang pagsungko sa kabalayan aron manghatag og mga sobre. Ang “mission envelope” nga ilang pasudlan og kuwarta alang kuno sa world general fund.
Tinuod nga may mga higayon nga ang Simbahan mopasiugda og ingon niini. Pero sa dili pa kamo mohatag, sutaa kun ang simbahan ba gyud ang tinuod nga nagpasiugda og pangolekta. Tingalig mabiktima kamo sa mga badlongon sa katilingban nga misuon lang sa paagi sa Simbahan pagpangolekta og donasyon.
Aron dili kamo mabiktima sa ingon niining matang sa pangilad, labing maayo nga sutaon una ninyo kun lehitimo ba ang pagpangolektag donasyon.
* **
(Sumbong ug reklamo? Text sa 0910-8105522)